Insannıń on eki múshesiniń pútin bolıp dúnyaǵa keliwi, bul onıń baxtı. Usınday baxıttan qalay paydalanıw onıń óziniń aqıl-oyı, sana-sezimi hám shańaraqta ata-anasınıń tikkeley tárbiyasına baylanıslı. Aramızdaǵı kewli kemtik, mayıplıǵı bar bolǵan insanlardıń ómirge degen kóz-qarasın, sabırlılıǵın, pikirlew dúnyasınıń keńligin, turmısta jaqsı jasawǵa degen umtılısların, ózi birewdiń járdemine mútáj bolıp turıp, turmısta erisip atırǵan tabısların kórip, ol insanǵa degen húrmet-izzetiń, sheksiz mehir-muhabbatıń artadı. Al, aramızdaǵı on eki múshesi saw, aqıl-esi pútin, kewli toq insanlardıń ayırımlarınıń turmısınan nalıwı, islep atırǵan is-háreketleri, meni húkimetimiz baqsın, ya jumıs penen támiyinlesin, mende anaw joq, mınaw joq, húkimet basshıları qayaqqa qarap otır dep nalıwdan sharshamaytuǵın insanlardı kórip, biraz, biraz emes, ádewir, kewliń qabaradı, kewliń suwıydı, olarǵa degen kóz-qarasıń ózgerip, olardan jerkeniw sezimleri sizde payda boladı. Olardı bunday is-háreketlerin kórgen hám bilgen xalqımız olardı kóbineshe qısqa gáp penen nashúkir insan eken dep qoyǵandı maqul kóredi.

Búgingi kúnde Ózbekstan mámleketlik dene tárbiyası hám sport universiteti Nókis filialı student jasları arasında mayıplıǵı bolǵan student jaslarda bilim almaqta. Olardıń hár biri ózleri mehir qoyǵan hám tınımsız shınıǵıwlar alıp barıp atırǵan sport túrleri boyınsha jaqsı nátiyjelerdi qolǵa kirgizip, professor-oqıtıwshıları menen ustaz-trenerleriniń isenimin aqlap kelmekte. Sport túrleri fakultetiniń eskek esiw baǵdarınıń 1-kurs studenti Madi Suleymenovta mine usınday studentlerden biri. Ol jaqında Tashkent qalasında mayıplıǵı bolǵan jaslar arasında sporttıń eskek esiw túrinen bolıp ótken jarısta qatnasıp sıylı birinshi orındı iyelep keldi.

– Ózbekstan Respublikası bilimlendiriw mákemelerine oqıwǵa qabıllaw boyınsha Mámleketlik komissiyasınıń 2021-jıl 2-iyuldaǵı bayanlamasınıń 2-qosımshasına muwapıq Respublikalıq  Joqarı oqıw orınlarına abiturientlerdi qabıl etiwdiń ulıwmalıq sanınan kelip shıǵıp mayıplıǵı bolǵan shaxslar ushın qosımsha eki procentli               mámleketlik grant tiykarında qabıllaw kórsetkishleriniń joqarı oqıw orınlarında hám tálim baǵdarları kesiminde bólistiriliwi bizlerge uqsaǵan imkaniyatı sheklengen, mayıplıǵı bolǵan shaxslar ushın joqarı oqıw ornında oqıw imkaniyatın jarattı. Negizi men balalıǵımnan sportqa mehir qoyıp qızıqanman. Biraq, kishkeneligimnen meneń moynıma shańaraqtı baǵıw juwapkershligi túskenligi sebepli, sport penen shuǵıllanıw múmkinshligim bolmaǵan. Balarıǵımda mektepten jazǵı dem alısqa shıqqan waqtımızda mekteptegi doslarım menen barı-joǵı úsh ay usı sport túrine qatnaǵanman hám soń qoyıp ketkenmen. Usı halıma eskek eskendegi mendegi qarıwdı, kúshti, alǵa qaray umtılıstı kórgen trenerim, meni usı sportqa tartıwǵa kóp háreket etti. Biraq, úydegi shańaraq jaǵdayımnıń kelispegenligi sebepli, mende bul sport túri menen shuǵıllanıw múmkinshligi bolmadı. Kún kóris, turmıs mashqalası menen qol ushı talap islep júrgenimdi kórgen trenerim  meni usı oqıw ornına oqıwǵa tapsırıwǵa iytermeledi hám 2021-2022-oqıw jılındaǵı qabıllaw kvotasındaǵı imkaniyatı sheklengen, mayıplıǵı bolǵan shaxslar ushın ajıratılǵan mámleketlik grant haqqında tolıq maǵlıwmat beriwge háreket etti hám hújjetlerimdi tapsırıwda ózi tikkeley járdemin berdi. Nesiybem bar eken házirgi kúnde usı filialdıń Sport túrleri fakultetiniń eskek esiw baǵdarınıń 1-kursında bilim alıp atırman. Teoriyada alǵan bilimlerimdi ámeliyat penen birlestirip onnan aqılǵa uǵras paydalanıp keleshekte jáhán chempionı bolıw niyetim bar,-deydi Madi Suleymanov.

Haqıyqatında Madidegi erteńgi kúnge bolǵan isenimdi kórip sizde bul insanǵa degen súyispenshilik sezimi payda boları tábiyiy.

         – Bul oqıwshımda ertengi kúnine isenimi kúshli. Shınıǵıwlar barısında qandayda bir usıldı úyretseńiz sonı orınlamaǵansha qoymaydı. Aradan kóp waqıt ótpey sol usıldı meńgerip alıw qábiletine iye. Onıń imkaniyatı sheklegen bolıwına qaramastan, sportqa bolǵan ıqlası bálent. Jaqında Tashkent qalasında imkaniyatı sheklengen jaslar bolıp ótken jarısqa qatnasıp, barlıq qarsılaslarınan ústin kelip 1-orındı iyelewi bul sózimizdiń ayqın dálili boladı. Bul Madidiń sporttaǵı birinshi jarısı hám birinshi nátiyjesi, – deydi oqıtıwshısı Seyilbek Seydullaev.

         Biz Madidiń keleshekte jáhán sport arenalarında sıylı orınlardı  alıp elimiz bayraǵın bálentlerge kóteriwlerine isenemiz.

Murat Tilewbaev,

Filial Baspasóz xızmeti.