1-dekabr – Qaraqalpaq tiline mámleketlik til biyligi berilgeniniń 32 jıllıǵı múnásibeti menen Ózbekstan mámleketlik dene tárbiyası hám sport universiteti Nókis filialında professor-oqıtıwshılar hám student-jaslardıń qatnasında ushırasıw bolıp ótti.

Ushırasıwdı filialdıń Jaslar awqamı baslanǵısh shólkemi jetekshisi I.Djaqsımuratov ashtı hám alıp bardı. Ol óz sózinde dáslep jıynalǵanlardı 1-dekabr – Qaraqalpaq tiline mámleketlik til biyligi berilgeniniń 32 jıllıǵı múnásibeti menen qızǵın qutlıqladı hám sońǵı jıllarda elimizde ana tilimizdi saqlawǵa, onı jáne de bayıtıwǵa mámleketlik siyasat dárejesinde itibar qaratılıp, ámeliy ilajlar ámelge asırılıp atırǵanlıǵın ayrıqsha atap ótti.

Bunnan soń Ózbekstan mámleketlik Jurnalistler awqamınıń aǵzası, Qaraqalpaqstan Respublikasına xızmet kórsetken jurnalist Shúkirbay Siypatdinov sózge shıǵıp, ol óz sózinde «Mámleketlik til haqqında»ǵı Qaraqalpaqstan Respublikası Nızamı qabıl etiliwi menen ótken jıllar dawamında ana tilimiz bekkem huqıqıy tiykarǵa hám joqarı statusqa iye bolǵanlıǵı,  til – bul xalıqtıń tariyxın, mádeniy miyrasların, turmıs tárizin, úrp-ádet hám salt-dástúrlerin ózinde jámlestirgen biybaha ǵáziyne ekenligin, qaraqalpaq tiliniń xalqımızdıń sociallıq turmısındaǵı abıroyı, ásirese, jaslar ana tilimizdi asırap-abaylaw kerekligi, óz sózligimizde bolǵan sózlerdiń ornına shet tillerden kirgen sózlerdiń tilimizge aralasıp ketiwiniń aldın alıw, ata-babalarımızdan miyras bolıp kiyatırǵan biybaha qádiriyatlarımızdı qásterlep, saqlap keleshek áwladlarǵa sap halında jetkeriw zárúrligin ayırıqsha atap ótti.

Bunnan soń filialdıń Sport túrleri fakulteti Jaslar menen islesiw, ruwxıylıq hám aǵartıwshılıq isleri boyınsha dekan orınbasarı Q.Kenjebaev sózge shıǵıp, búgingi rawajlanıwımızdıń jańa basqıshı – milliy rawajlanıw dáwiri talaplarınan kelip shıǵıp, ana tilimizdiń jámiyettegi ornın hám abıroyın arttırıw, ana tilimizdiń tariyxıy tamırların tereń úyreniw, onı ilimiy tiykarda hár tárepleme rawajlandırıw hám qollanıw órisin keńeytiw boyınsha alıp barılıp atırǵan keń kólemli jumıslar haqqında keń túrde maǵlıwmatlar berip ótti.

Ilaj dawamında student-jaslar ózlerin qızıqtırǵan sorawlarına taraw qánigelerinen juwaplar aldı.

Filial Baspasóz xızmeti.