8-dekabr – Ózbekstan Respublikasí Konstituciyasí qabíl etilgen kún
Ózbekstan Respublikası Konstituciyası qabıl etilgen kúni bayramı aldınan Ózbekstan mámleketlik dene tárbiyası hám sport universiteti Nókis filialında 8-dekabr – Ózbekstan Respublikası Konstituciyası qabıl etilgen kúni múnásibeti menen «Ózbekstan Respublikası Konstituciyasınıń jigirma toǵız jıllıǵı» atamasında ushırasıw keshesi bolıp ótti.
Ushırasıwǵa Qaraqalpaqstan Respublikası Prokuratura bólimi baslıǵı J.Baxitov, Qaraqalpaqstan Respublikası sudınıń sudiyası U.Sabirov hám filial xızmetkerler, professor-oqıtıwshıları hám student jaslar qatnastı.
Kesheni filial direktorı wáziypasın waqtınsha atqarıwshı M.Aytımbetov kiris sóz benen ashtı hám qatnasıwshılardı Ózbekstan Respublikası Konstituciyası qabıl etilgenine jigirma toǵız jıl tolǵanlıǵı menen qızǵın kutlıqladı hám ushırasıwǵa kelgen miymanlardı tanıstırıp ótti.
Ushırasıw dawamında Qaraqalpaqstan Respublikası Prokuratura bólimi baslıǵı J.Baxitov, Qaraqalpaqstan Respublikası sudınıń sudiyası U.Sabirov hám filial Keńesi xatkeri M.Tólegenovlar ózleriniń bayanatlarında Ózbekstan Respublikası Konstituciyası 1992-jılı 8-dekabr kúni qabıl etilgenligin.
2021-jıl 8-dekabr kúni Konstituciyamızdıń qabıl etilgenine jigirma toǵız jıl tolatuǵınlıǵın. Bul elimizde keń túrde bayram sıpatında belgilenip ótiletuǵınlıǵın.
Ózbekstan Respublikası Konstituciyası 6 bólim, 26 bap, 128 statyadan ibarat bolıp, onıń hár bir statyası elimizde jasaytuǵın puqaranıń qaysı millet wákili bolıwınan qaramastan olardıń huqıqların qorǵawda, turmıs táriziniń abadanlıǵın hám rawajlanıwın támiyinlewde ádalattıń bas nızamı bolıp tabılatuǵınlıǵın.
Ózbekstan Respublikası Konstituciyası huqıqıy demokratiyalıq mámleket hám jańa jámiyet qurıwda áhmiyetli orın iyelewin. Konstituciya – mámlekettiń rawajlanıwın, tınıshlıǵın, qáwipsizligin támiyinlewdiń kepili hám ulıwma insanıylıq qádiriyatlardı ózinde jámlegen milliy úrp-ádetlerimizdiń, ana tilimizdiń, xalqımızdıń biybaha baylıqların, mádeniy-miyrasınıń huqıqıy tiykarı Konstituciyamız ekenligin hám bas nızamımızdıń jámiyettegi tutqan ornı haqqında filial xızmetkerleri, professor-oqıtıwshıları hám student jaslarına keńnen túsinikler berip ótti.
Ushırasıw dawamında ilaj qatnasıwshıları tiyisli taraw qánigelerinen ózlerin qızıqtırǵan sorawlarına juwaplar aldı.
Filial Baspasóz xızmeti.