Ózbekstan Respublikası Prezidentiniń 2019-jıl 4-dekabr kúngi “Ózbekstanda futboldı rawajlandırıwdı pútkilley jańa basqıshqa alıp shıǵıw is-ilajları haqqında»ǵı PP-5887-sanlı pármanınıń orınlanıwın támiyinlew, studentler arasında sporttıń futbol, mini-fubol (futzal) túrlerin keńnen rawajlandırıw, salamat turmıs tárizin qáliplestiriw, bos waqıtların sport penen qızıqlı hám mazmunlı ótkeriw, komandalar arasında  doslıq qatnasıqlardı bekkemlew, sonıń menen birge alda bolatuǵın jarıslarǵa komandamızdıń fizikalıq tayarlıqların sınaqtan ótkeriw maqsetinde Ózbekstan mámleketlik dene tárbiyası hám sport universiteti Nókis filialınıń student jasları arasınan dúzilgen futbol komandası sporttıń futbol, mini-futbol (futzal) túrlerinen Qaraqalpaqstan Respublikası jarıslarına qatnasıp kelmekte.

Atap aytatuǵın bolsaq, ótken 2020-2021-jılǵı Qaraqalpaqstan Respublikası mini-futbol chempionatı máwsiminde biziń filialımız komandası 3-orındı iyelegen bolsa, 2021-jılǵı futbol chempionatı máwsiminde Qaraqalpaqstan Respublikası chempionı ataǵın jeńip alıwǵa eristi. Bul jetiskenliklerge erisiwde filialımız jámááti úlken rol oynadı. Olar bárháma bizlerdi qollap-quwatlap turdı. Filialımız komandası 2022-jılı bolıp ótiwi názerde tutılǵan Qaraqalpaqstan Respublikası futbol, mini-futbol (futzal) chempionatlarına qatnasıwǵa tayarlıqlardı baslap jiberdi.

Filialımız komandasınıń tayarlıqların sınaqtan ótkeriw maqsetinde usı jıldıń 4-dekabr kúni Xorezm wálayatınıń Urgench mámleketlik universitetiniń student jaslarınan dúzilgen futbol komandası menen joldaslıq ushırasıw ótkerdik.

 Bul ushırasıuda filialımız komandası jaqsı oynap, ózleriniń hár tárepleme ústin ekenligin kórsetip, qarsılas komanda aǵzalarına hesh  qanday imkaniyat qaldırmadı 4:0 esabında jeńiwge eristi. Komandamız aǵzaları Abror Sapaev, Anvar Barlıqbaev, Jasurbek Tajibaev hám Jahangir Yusupovlar qarsılasımız darwazasına bir toptan gol urıwǵa eristi.

Islam Abdullaev,

Filialdıń oqıtıwshı-treneri.