Turmısta qısılǵan adamlarǵa járdem etiw, jetim-jesir, ǵárip-qáserlerge qayır-saqawat kórsetiw ázelden xalqımızdıń qanına sińgen aǵla pazıyletlerdiń biri bolıp tabıladı. Ásirese, sońǵı jıllarda bunday háreketlerdiń nızamlı tús alıp, olarǵa húkimetimiz hám mámleketlik uyımlardıń belsene aralasıwı biz jaratıp atırǵan Jańa Ózbekstannıń tereń gumanizm, joqarı adamgershilik principleri tiykarında qurılıp atırǵanınan derek beredi. 

2021-jıl 17-sentyabrde Ózbekstan Respublikası Ministrler Kabinetiniń «Ata-anası yaki olardıń birinen ayırılǵan mútáj qızlar hám baǵıwshısı joq jalǵız hayallardıń joqarı bilim alıwın materiallıq jaqtan qollap-quwatlaw ilajları haqqında»ǵı 585-sanlı qararı qabıl etilgen edi. Usı qarar hám Ózbekstan Respublikası Prezidentiniń 2021-jıl 5-marttaǵı «Hayal-qızlardı qollap-quwatlaw, olardıń jámiyet turmısındaǵı belsendi qatnasıwın támiyinlew sistemasın bunnan bılay da jetilistiriw ilajları haqqında»ǵı qararı talaplarına muwapıq, 2021-2022-oqıw jılınan baslap bazalıq tólem-kontrakt tiykarında mámleketlik joqarı bilimlendiriw mákemesine qabıl etilgen, ata-anası yaki olardıń birinen ayırılǵan mútáj qızlar, baǵıwshısı joq jalǵız hayallardı Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri hám de mámleketlik joqarı bilimlendiriw mákemeleri esabınan oqıtıw tártibi engizilip, oqıw ushın tólem pulları Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri tárepinen hár jılı 100 hayal-qızlar ushın jergilikli byudjettiń qosımsha derekleri esabınan tólep beriletuǵını belgilengen edi.

Joqarıda atap ótilgen taypaǵa kiretuǵın studentlerdi qollap-quwatlaw hám jaslarǵa baylanıslı mámleketlik siyasat baǵdarlamasında belgilengen wazıypalardıń orınlanıwın támiyinlew baǵdarında Ózbekstan mámleketlik dene tárbiyası hám sport universiteti Nókis filialı tárepinen de bir qansha ilajlar ámelge asırılmaqta. Atap aytqanda, sport psixologiyası fakultetiniń 4-kurs studenti G.Jiemuratova, 2-kurs studenti U.Smetullaevalardıń shańaraqlıq hám jasaw sharayatları esapqa alınıp, bir jıllıq shártnama pulları tólep berildi. Bunday ǵamqorlıq student qızlarımızdıń oqıwǵa, jámiyetlik jumıslarǵa bolǵan qızıǵıwshılıǵın bunnan bılay da arttıradı dep oylaymız.

Joqarıdaǵıday qayır-saqawatlıq ilajları filialımızda aldaǵı waqıtları da dawam ete beredi.

B.ALLAMBERGENOVA,

Ózbekstan mámleketlik dene tárbiyası hám sport universiteti Nókis filialı direktorınıń hayal-qızlar máseleleri boyınsha másláhátshisi.