Gruziyanıń Tbilisi qalasında qılıshpazlıqtıń sablya baǵdarı boyınsha Jáhán kubogı turniri baslandı. Hayal-qızlar arasında jerlesimiz Zaynab Dayıbekova reytingdegi 22-ornı menen medallar ushın jarısqa túsiw imkaniyatın saqlap qaldı.

«Olympic.uz»dıń xabar beriwinshe, joqarı reytingi sebepli qaraqalpaqstanlı sportshı 1/64 final basqıshınan jarıslarǵa qosıladı. Málim bolıwınsha, Ózbekstannan qatnasıp atırǵan basqa barlıq jas qılıshpazlar saylap alıw jarıslarında imkaniyattı qoldan bergen. 1/32 finalǵa jol alıw ushın Dayıbekova franciyalı Amaliya Emidi (43) jeńip shıǵıwı kerek.

Zaynab usı qarsılasın jeńe alsa, yaponiyalı Norika Tamura (11) hám italiyalı Eliza Passaro (54) qarama-qarsılıǵınıń jeńimpazı menen duslasadı. Aldaǵı jarıslarda jerlesimizge áwmet hám jeńisler tilep qalamız.

Islam Matekov