2021-jıl 24-dekabr kúni joqarı bilimlendiriw sistemasında ámelge asırılıp atırǵan reformalardıń nátiyjeliligin arttırıw, mámleketlik joqarı bilimlendiriw mákemeleriniń finanslıq turaqlılıǵın támiyinlew, materiallıq-texnikalıq bazasın bekkemlew máselelerin erkin sheshiw, ilimiy-izertlew jumısına qarjılardı tartıw imkaniyatın keńeytiw hám joqarı bilimlendiriw mákemeleri arasında básekilik ortalıǵın rawajlandırıw maqsetinde Prezidentimiz tárepinen joqarı oqıw orınları sistemasınıń unamlı tárepke ózgeriwine alıp keletuǵın eki qarar qabıl etildi. Usı qararlar tiykarında joqarı bilimlendiriw sistemasındaǵı basqarıw sisteması, oqıw processleri jańa baǵdarǵa ótpekte.

Usı maqsette joqarı bilimlendiriw tariyxında birinshi márte – rektorlar, prorektorlar, dekanlar, finanslıq máselelerge juwapker qánigeler ushın, olardıń kásiplik sheberligin arttırıw, jańasha tártipte islewdi baslaw maqsetinde, usı jıldıń 10-24-yanvar kúnleri aralıǵında, tastıyıqlanǵan reje tiykarında ámeliy seminar-triningler ótkerip kelinbekte.

Student-jaslardıń qısqı dem alıs kúnleriniń 10-yanvardan 24-yanvarǵa shekem sozılǵanınan utımlı paydalanılıp, Ózbekstan mámleketlik denetárbiya hám sport universiteti Nókis filialında da filialdıń professor – oqıtıwshıları oqıtılmaqta.

– Búgingi seminarda, filialdıń professor-oqıtıwshılarına «Joqarı oqıw orınları sistemasın basqarıw – Xemis baǵdarlamasınan nátiyjeli paydalanıw», «Kredit modul sisteması tiykarında bilimlendiriw processlerin shólkemlestiriw» hám «Akademiyalıq hám finanslıq erkinliktiń imkaniyatları» máseleleri boyınsha filial direktorınıń oqıw isleri boyınsha orınbasarı B.Utemuratov, oqıw isleri boyınsha bólim baslıǵı D.Qoshanov, «Sport túrleri» fakulteti dekanınıń oqıw isleri boyınsha orınbasarı B.Tayrovlar tárepinen keń túrde túsinikler berildi,-deydi filialdıń stajyor-oqıtıwshısı A.Primbetov. – Ózbekstan Respublikası Prezidentiniń 2021-jıl 24-dekabr kúngi «Mámleketilik joqarı bilimlendiriw mákemelerine finanslıq erkinlik beriw ilajları haqqında»ǵı hám «Mámleketlik joqarı bilimlendiriw mákemeleriniń akademiyalıq hám shólkemlestiriw-basqarıw erkinligin támiyinlew boyınsha qosımsha ilajlar haqqında»ǵı qararlarına tiykarlanıp engizilgen ózgerisler tuwralı da keń túrde maǵlıwmatlar berildi.

Seminarlar dawamında, finanslıq erkinlik berilip atırǵan mámleketlik joqarı bilimlendiriw mákemeleri, usı bilimlendiriw mákemelerine berilgen erkin qarar qabıl etiw wákillikleri, professor-oqıtıwshılardıń shtat birliklerin kirgiziw normaların islep shıǵıw sıyaqlı basqa da bir qatar jańalıqlarǵa iye boldıq.

Seminar-treningler barlıq joqarı oqıw orınlarında dawam etpekte.

Á.Jiemuratov,

Qaraqalpaqstan xabar agentligi