Akademik Baxtiyor Nazarov

Belgili ádebiyattanıwshı ilimpaz, ózbek ádebiy sınınıń jetekshi ǵayratkerlerinen biri, Ózbekstan Ilimler akademiyasınıń akademigi Baxtiyor Nazarov 77 jasında qaytıs boldı.

B.Nazarov 1945-jıl 17-sentyabrde Tashkent qalasında tuwıldı. 1966-jılı Tashkent mámleketlik universitetin (házirgi Ózbekstan Milliy universiteti) tamamlap, miynet jolın mektep muǵallimshiliginen basladı, keyin ala Ózbekstan Respublikası Ilimler akademiyası Til hám ádebiyat institutı (házirgi Ózbek tili, ádebiyatı hám folklorı institutı) aspiranturasında oqıdı. Dáslep kandidatlıq, soń doktorlıq dissertaciyaların qorǵadı. 2000-jılı Ózbekstan Respublikası Ilimler akademiyasınıń akademigi etip saylandı.

Talantlı ilimpaz óziniń 55 jıllıq ilimiy pedagogikalıq jumısı dawamında Ózbekstan enciklopediyası redakciyasınıń redaktorı, Ilimler akademiyası prezidentiniń keńesgóyi, bas ilimiy xızmetker, Ilimler akademiyası Til hám ádebiyat institutınıń kishi, aǵa ilimiy xızmetkeri, bólim baslıǵı, ilimiy xatker, direktor, Ilimler akademiyası sociallıq-gumanitarlıq pánler bólimi ilimiy xatkeri, bas ilimiy xatker orınbasarı, Ózbekstan Respublikası Prezidentiniń mámleketlik keńesgóyi, Joqarı hám orta arnawlı bilimlendiriw ministriniń birinshi orınbasarı lawazımlarında nátiyjeli miynet etti.

Ózbek ádebiy sınınıń ilimiy tiykarların jaratıw boyınsha fundamental izertlewler alıp barıp, tarawda joqarı maman kadrlar tayarlawǵa múnásip úles qostı. Atap aytqanda, onıń basshılıǵında 10 ilim doktorı hám 20 dan aslam ilim kandidatları tayarlanǵan.

B.Nazarovtıń XX ásir ózbek ádebiyatı hám házirgi ádebiy processke baylanıslı ilimiy miynetleri, sabaqlıqları, onlaǵan monografiya hám qollanbaları, 200 den aslam ilimiy maqalaları zamanagóy ózbek ádebiyatınıń kórkemlik dárejesin bahalawda ózine tán orın iyeleydi.

Akademik B.Nazarovtıń mámleketimiz ilimin rawajlandırıw baǵdarındaǵı xızmetleri mámleketimiz tárepinen múnásip sıylıqlandı. Ol «Ózbekstan Respublikası ilim ǵayratkeri» húrmetli ataǵına erisken edi.

Belgili ilimpaz, mehriyban ustaz, kishipeyil insan Baxtiyor Nazarovtıń esteligi kewillerimizde máńgi saqlanıp qaladı.

Sh.Mirziyoev, T.Norboeva, N.Ismoilov,

A.Aripov, B.Ywldoshev, S.Saidov