Aldın xabar bergenimizdey, joqarı oqıw orınlarında bilim alıp atırǵan student jaslardıń qısqı dem alıs kúnleri 2022-jıldıń 10-yanvar sánesinen 24-yanvar sánesine shekem sozılǵan edi.

Densawlıqtı saqlaw ministrligi hám Sanitariya-epidemiologik tınıshlıq hám jámiyet salamatlıǵı xızmetiniń usınısına tiykarlanıp koronavirus infekciyasınıń jańa shtampı balalar hám jaslar arasında tarqalıwınıń joqarı ekenligin itibarǵa alǵan halda barlıq joqarı (mámleketlik, mámleketlik emes, jeke menshik hám sırt el joqarı oqıw orınlarınıń filialları) hám professional bilimlendiriw mákemeleri, akademiyalıq liceylerde (barlıq bilimlendiriw formaları hám túrleri boyınsha) usı jıldıń 24-yanvar sánesinen baslap, bir ay dawamında bilim alıw sisteması aralıqtan (onlayn) kórinisinde alıp barıw belgilengen edi.

Búgin 24-yanvar kúninen baslap barlıq joqarı oqıw orınlarında bolǵanı sıyaqlı Ózbekstan mámleketlik dene tárbiyası hám sport universiteti Nókis filialında da oqıw procesi aralıqtan (onlayn) kórinisinde baslandı.

Sabaqlar filialdıń professor-oqıtıwshıları tárepinen belgilengen keste tiykarında anıq hám sapalı túrde student-jaslardıń qatnasın támiyinlegen halda alıp barılmaqta.

Filial Baspasóz xızmeti.