1-fevraldan Ózbekstanda neler ózgeredi?
Ádillik ministrligi 1-fevraldan baslap nızamshılıqta qanday ózgerisler bolatuǵını haqqında maǵlıwmat berdi.
- Fizikalıq táreplerge ózin-ózi bánt etken shaxs sıpatında óz shańaraǵında balıq jetistiriwdi jolǵa qoyıwǵa ruxsat beriledi.
2022-jıl 1-fevraldan 2025-jıl 1-yanvarǵa shekem balıqshılıqtı intensivlestiriw ushın zárúr bolǵan ásbap-úskeneler hám texnologiyalar (aerator, basseyn, avtokormushka, UZV) hám qayta islew úskenelerin islep shıǵarıwdı jolǵa qoyǵan, biraq dáramattıń 80 procentinen aslamın usı úskenelerdi islep shıǵarıwdan alatuǵın subektler ushın:
– payda salıǵı (kommerciyalıq banklerde jaylastırılǵan qarjılardan alınǵan procentlerden tısqarı);
– yuridikalıq táreplerden alınatuǵın jer salıǵı;
– yuridikalıq táreplerdiń múlk salıǵı hám suw resurslarınan paydalanǵanı ushın salıq stavkaları 50 procentke azaytıladı.
- Jetim balalar hám ata-ana qaramaǵınan ayırılǵan balalar elektron sistema arqalı anıqlanadı.
Húkimettiń 26-sanlı qararına tiykarlanıp «Mehr dápteri»ne kirgizilgen jetim balalar hám ata-ana qaramaǵınan ayırılǵan balalarǵa baylanıslı maǵlıwmatlar «Elektron húkimet» sisteması uyımlararalıq integraciyalasıw platforması arqalı anıqlanadı.
- Korrupciyaǵa qarsı gúresiw jumıslarınıń nátiyjeliligin reyting bahalaw sisteması engiziledi.
Ózbekstan Respublikası Prezidentiniń PQ-81-sanlı qararına bola, 2022-jıl 1-fevraldan baslap korrupciyaǵa qarsı gúresiw jumıslarınıń nátiyjeliligin reyting bahalaw sisteması, eksperiment tárizinde, tiyisli dizimde keltirilgen hám óziniń jumısında korrupciyaǵa qarsı menedjment sistemasın engizip atırǵan mámleketlik shólkemlerdiń jumısına engiziledi.
- Jańa hákim orınbasarı lawazımı engiziledi.
Ózbekstan Respublikası Prezidentiniń PQ-76-sanlı qararına bola, 2022-jıl 1-fevraldan baslap:
wálayatlar hám rayonlar (qalalar) hákimleriniń kapital qurılıs, kommunikaciyalar hám kommunal xojalıq máseleleri boyınsha orınbasarı lawazımı saplastırılıp, qurılıs, kommunikaciyalar, kommunal xojalıq, ekologiya hám kóklemzarlastırıw máseleleri boyınsha orınbasarı lawazımı engiziledi.
Sonday-aq, Prezident qararında Tashkent qalası hám onıń rayonları hákimleriniń arxitektura, kapital qurılıs, kommunikaciyalardı rawajlandırıw máseleleri boyınsha birinshi orınbasarı lawazımı saplastırılıp, qurılıs, kommunikaciyalardı rawajlandırıw, ekologiya hám kóklemzarlastırıw máseleleri boyınsha birinshi orınbasarı lawazımınıń kirgiziliwi belgilengen.
Qaraqalpaqstan xabar agentligi