Ózbekstannıń qılıshpazlıq sport túriniń ayqın juldızı Ózbekstan mámleketlik dene tárbiyası hám sport universiteti Nókis filialı studenti Zaynab Dayıbekova búgin elimizdi dúnyaǵa tanıtıp atırǵan úmitli jaslarımızdan biri bolıp tabıladı. Máqtanısh penen sonı ayta alamız, yanvar ayında Zaynab Dayıbekova Qurallı kúshler qatarına qabıl etildi hám Watanǵa sadıqlıq antın qabıl etti. Bunnan bılay ol áskeriy sportshılar qatarında Arqa-batıs áskeriy okruginiń sport vzvodında óz xızmetin alıp baradı. 

Zaynab Dayıbekova qılıshpazlıq sport túri boyınsha joqarı nátiyjelerdi kórsetip atırǵan ápsánalı sportshılar qatarınan da orın alıwǵa úlgerdi. Atap ótiw kerek, Zaynab Dayıbekova Ózbekstan hám Xalıqaralıq dárejedegi sport ustası ataǵına iye. “Shuxrat” hám “Jasorat” medalları, sonıń menen birge “Qaraqalpaqtan Respublikasında xızmet kórsetken sportshı” húrmet ataǵı menen sıylıqlanǵan. Xalıqaralıq jarıslarda belsene qatnasıp, sıylıqlı orınlardı iyelep kelmekte. Ásirese, 2017-jıl qılıshpazlıq boyınsha Tayland paytaxtı Bangkok qalasında bolıp ótken Aziya chempionatında sıylıqlı úshinshi orındı qolǵa kiritkeni Ózbekstan qılıshpazlarınıń xalıqaralıq jarıstaǵı dáslepki jeńisi esaplanadı. Zaynabtıń bunday nátiyjesi sol jılı Ózbekstan Respublikası Prezidentiniń Qaraqalpaqstanǵa bolǵan saparı waqtında múnasip baxalandı. 

Yaponiya paytaxtı Tokio qalasında ótkerilgen XXXII jazǵı Olimpiada oyınlarında belsene qatnasıp kúshli segizlikten orın aldı. 
– “Keleshekte Qorǵanıw ministrliginiń abroyın qorǵaǵan xalda Ózbekstan bayraǵın jáhán arenasında joqarıǵa alıp shıǵıqpaqshıman” – deydi Zaynab Dayıbekova óziniń intervyusinde. 

Óz gezeginde, Qaraqalpaqstan Respublikası Turizm hám sport bas basqarması atınan sportshımızǵa úlken jeńisler hám joqarı nátiyjelerge erisiwde áwmet tilep qalamız.

Qaraqalpaqstan Respublikası Turizm hám sport bas basqarmasınıń málimleme xızmeti