Korrupciyanıń aldın alıw hám oǵan qarsı gúresiw baǵdarında mámleketimizde bir qatar kólemli jumıslar alıp barılmaqta. 

Ózbekstan mámleketlik dene tárbiyası hám sport universiteti Nókis filialınıń “Korrupciyaǵa qarsı gúresiw hám Komplaens qadaǵalaw sistemasın basqarıw” bólimi hám Qaraqalpaqstan Respublikası Prokuraturası menen birgelikte dekan, dekan orınbasarları, kafedra baslıqları, professor-oqıtıwshılar hám tyutorlar qatnasıwında “Korrupciyasız taraw” joybarı sheńberinde ulıwmaprofilaktiklıq ilaj bolıp ótti.

         Ilajdı filialdıń oqıw isleri boyınsha direktor orınbasarı B.Utemuratov ashtı hám basqarıp bardı. Ol óz sózinde korrupciyanıń hár bir tarawdıń rawajlanıwında qanshelli dárejede keri hám unamsız tásir kórsetiwi haqqında keń túrde aytıp ótti. Bunnan soń Qaraqalpaqstan Respublikası Prokuraturası bólimi baslıǵınıń orınbasarı Sh.Allambergenov sóze shıǵıp ol óz sózinde “Korrupciyaǵa qarsı gúresiw haqqında”ǵı Nızam, Korrupciyaǵa qarsı gúresiw mámleketlik baǵdarlaması hám Ózbekstan Respublikası Prezidentiniń 2020-jıl  29-iyun  kúngi “Ózbekstan Respublikasında korrupciyaǵa qarsı gúresiw sistemasın rawajlandırıw boyınsha qosımsha is-ilájlar haqqında”ǵı arnawlı Pármanınıń qabıl etilgenligi hám usı Párman tiykarında Ózbekstan Respublikası Korrupciyaǵa qarsı  gúresiw  agentligi hám Korrupciyaǵa qarsı gúresiw boyınsha respublika mákemeler ara komissiyası hám onıń aymaqlıq mákemeler ara komissiyaları Ózbekstan Respublikası korrupciyaǵa qarsı gúresiw milliy Keńesi etip qayta shólkemlestirilgenligi haqqında iláj qatnasıwshılarına tolıq maǵlıwmat berip ótti. Sonday-aq, Ózbekstan Respublikası Prezidentiniń tarawǵa baylanıslı qabıl etken Párman hám qararlarınıń hám Ózbekstan Respublikası Jınayat Kodeksiniń “Para alıw”, “Para beriw”, “Para alıw-beriwde dáldelshilik etiw” statyalarınıń mazmun-mánisi haqqında jıynalǵanlarǵa keń túrde túsinikler berip ótti. Bunnan tısqarı respublikamızda hár jılı tarawlar kesiminde áynen usı baǵdarda anıqlanǵan jınayatlar haqqında da statistikalıq maǵlıwmatlardı keltirip ótti. Dámegóyshilik jolı menen para alıw, para beriw, para alıw-beriwde dáldelshilik etiwde qatnasıw juwapkershlikke tartıwǵa sebep boladı dep atap ótti.

         Soń iláj qatnasıwshıları ózlerin qızıqtırǵan sorawlarına tiyisli taraw qánigelerinen juwaplar aldı.

A.Mambetkarimov,

ÓzMDTSU Nókis filialınıń “Korrupciyaǵa qarsı gúresiw hám Komplaens qadaǵalaw sistemasın basqarıw” bólimi bas qánigesi.