Ózbekstan mámleketlik dene tárbiyası hám sport universiteti Nókis filialınıń «Ziyrek studentlerdiń ilimiy-izertlew iskerligin shólkemlestiriw» bólimi tárepinende respublikamızdaǵı joqarı oqıw orınlarında jumıs islep, ilim jolında ilimiy izlenisler alıp barıp atırǵan ilimpazlar menen filialdıń «Sport innovaciya» dógeregi aǵzaları menen turaqlı túrde ushırasıwlar ótkerilip kelinbekte.

Búgin usınday ushırasıwlardıń náwbettegisi bolıp ótti. Ushırasıwdı Ilimiy isler hám innovaciyalar boyınsha direktor orınbasarı M.Aytımbetov kiris sóz benen ashtı hám basqarıp bardı. Sonday-aq, ol óz sózinde ilim jolınıń mashaqatlı hám maqtanıshlı tárepleri, ilimge jańalıq kirgiziwdiń ańsat emes ekenligi, bunıń ushın hár bir ilim jolında izlenisler alıp barıp atırǵan insannan yaǵnıy alım hám bolajaq ilimpazlardan kóp izlenisti hám sabrlılıqtı talap etetuǵınlıǵına ayrıqsha toqtap ótti.

Soń ushırasıw miymanı jurnalist, folklortanıwshı alım, jáne pedagog-ilimpaz, filologiya ilimleri boyınsha filosofiya doktorı E.Qanaatov sózge shıqtı. Ol óz sózinde «Ziyrek studentlerdiń ilimiy-izertlew iskerligin shólkemlestiriw» bóliminiń «Sport innovaciya» dógeregi aǵzalarına eń dáslep ózińiz haqqında, dóretiwshiligi haqqında, ilimiy iskerligi xaqqında maǵlıwmat berip ótti. Ushırasıw miymanı bolǵan filologiya ilimleri boyınsha filosofiya doktorı ilim jolına qádem qoyıp atırǵan student jaslarǵa ilimiy izertlewdiń eń dáslepki basqıshları boyınsha da túsinikler berdi.

Ilim jolındaǵı izleniwshi ushın kerekli ádebiyatlar deregin qalay hám qay jerlerden izlewi kerekligi haqqında keń túrde maǵlıwmatlar berip ótti. Sonday-aq, ol óziniń jurnalistlik xızmeti hám ilimiy izlenisleri dawamında elimizde hám shet ellerde xızmet saparlarında júz bergen eń este qalarlıq qızıqlı waqıyaları haqqında da student jaslarǵa aytıp berdi.

Soń ilimiy konferenciyalarǵa ózleriniń ilimiy miynetleri menen belsene qatnasıp, bayanat jasap júrgen «Ziyrek studentlerdiń ilimiy-izertlew iskerligin shólkemlestiriw» bólimi «Sport innovaciya» dógeregi aǵzalarına filial direktorınıń atınan minnetdarshlıq xat saltanatlı ráwishte tapsırıldı.

Filial Baspasóz xızmeti.