Elimizde avtotransport quralları sanınıń kún sayın artıp barıwı hár bir avtotransport quralı basqarıwshılarınan jollarda júrgende belgilengen orınlarda tezlikti sheklengen normadan asırmaw, sergeklik penen basqarıw, jol háreketi qaǵıydalarına tolıq ámel etiwi hám boysınıwı talap etiledi. Eger avtotransport quralı basqarıwshıları belgilengen tártip hám normalarǵa boysınbasa olarǵa tiyisli tártipte taraw qánigeleri tárepinen járiyma salıwǵa sebeb bolatuǵınlıǵı, búgingi kúnde bárshemizge málim. Al, eger avtomobil jollarınan piyadalar hám velosiped basqarıwshıları háreketlengende hám joldıń belgilenbegen orınlarınan kesip ótkende, yamasa háreketlenip kiyatırǵan avtomobildiń háreketleniwine kesent etip, avtotransport qurallarınıń avariyalıq jaǵdaylarınıń kelip shıǵıwına sebepshi bolǵanda olarǵa qanday sharalar kóriletuǵınlıǵı haqqında búgingi kúnde kópshilik tolıq maǵlıwmatqa iye bolmasa kerek.

Ózbekstan mámleketlik dene tárbiyası hám sport universiteti Nókis filialı student-jaslarına jol háreketi qaǵıydaların keńnen túsindiriw maqsetinde Qaraqalpaqstan Respublikası Ishki isler ministrligi Jol háreketi qáwipsizligi basqarması baspasóz toparı kishi inspektorları T.Qurbanbaev hám T.Utemuratovlardıń qatnasıwında ushırasıw bolıp ótti.

Ushırasıwdı filialdıń «Jaslar menen islesiw, ruwxıylıq hám aǵartıwshılıq bólimi» baslıǵı B.Sabirov ashtı hám basqarıp bardı. Soń taraw qánigeleri sózge shıǵıp olar eń dáslep avtotransport quralın basqarǵanda, piyadalarımız avtotransport jolların kesip ótkende birinshi náwbette nelerge itibar qaratıw kerek ekenligine ayrıqsha toqtap ótti. Yaǵnıy, joldıń arnawlı ótiw ushın belgilenbegen orınlarınan kesip ótken puqaralarǵa Ózbekstan Respublikası Hákimshilik juwapkershilik haqqındaǵı kodekstiń 138-statiyasına tiykarlanıp járiyma jazasın qollanıwǵa bolatuǵınlıǵı haqqında keń túrde maǵlıwmat berdi.

Ilaj barısında student-jaslar ózlerin qızıqtırǵan sorawlarǵa tiyisli taraw qánigelerinen juwaplar aldı.

Filial Baspasóz xızmeti.