Belgili bayram sáneleri qarsańında elimizde hár qıylı sport jarısların turaqlı túrde ótkeriw dástúrge aylanǵan.

«Nawrız» ulıwmaxalıqlıq bayramı qarsańında paytaxtımız Nókis qalasında jaylasqan oraylıq «Turan» stadionında sporttıń futbol túrinen Qaraqalpaqstan Respublikası Ministrler Keńesi kubogı ushın jarıs bolıp ótpekte. Shólkemlestirilip atırǵan kubok ushın respublikamızdıń qala hám rayonlarınan kelgen jámi on komanda jeńimpazlıq ushın kúsh sınaspaqta. Kubogtıń birinshi tur oyınlarında Ózbekstan mámleketlik dene tárbiyası hám sport universiteti Nókis filialınıń «Tarlan» komandası menen Ájiniyaz atındaǵı Nókis mámleketlik pedagogikalıq institutınıń  «NMPI» saylandı komandaları óz-ara kúsh sınastı. Jeńimpazlıq ushın alıp barılıp atırǵan jarıstıń birinshi tur oyınlarında filialımızdıń «Tarlan» komandası 2-1 esabı menen qarsılas komandadan ústin keldi.

Ekinshi tur oyınlarında filialdıń «Tarlan» komandası Shomanay rayonınıń «Mamıy» komandası menen esap 2-2 bolıp kúshler teńlesip qalǵan bolsa, úshinshi tur oyınlarında filialdıń «Tarlan» komandası Balalar hám jas óspirimler futbol mektebiniń «BÓFM-2004» komandasınan 1-0 esabı menen ústin keldi.

Búgin 14-mart kúni filialımızdıń «Tarlan» komandası 3-1 esabı menen Xojeli rayonınıń «Xoja-eli» komandasınan ústin keldi hám jarıstıń keyingi tur oyınlarına jollama aldı.

«Tarlan» komandası aǵzaların jarısqa Islam Abdullaev tayarladı.

«Tarlan» komandası aǵzalarına kubok jeńimpazı bolıwına tileklespiz…

Filial Baspasóz xızmeti.