Báhár keldi. Náwbáhár keldi. Nurlı quyash jibitdi jerdi. Qısqı toqsan náwbetdi endi. Náwbáhárdey pasılǵa berdi. Shıǵıs xalıqlarınıń jıl bası esaplanǵan 21-mart – «Nawrız» ulıwmaxalıqlıq bayram tamashaları elimiz boylap dawam etpekte. «Hár kúniń bolsın Nawrız» atamasında búgin 19-mart kúni Ózbekstan mámleketlik dene tárbiyası hám sport universiteti Nókis filialı miynet jámááti aǵzalarıda bayram saltanatın kóterińki ruwxta kútip aldı.

«Nawrız» ulıwmaxalıqlıq bayram saltanatın Ózbekstan mámleketlik dene tárbiyası hám sport universiteti Nókis filialı direktorı, tariyx ilimleri kandidatı, docent Bayram Mambetov kiris sóz benen ashtı hám bárshe jıynalǵanlardı bayram menen qızǵın qutlıqladı hám 1-14-mart kúnleri aralıǵında Iordaniya paytaxtı Amman qalasında boks boyınsha jas óspirimler hám jaslar arasında ótkerilgen Aziya chempionatında 60 kg salmaq kategoriyasında qola medalın qolǵa kirgizgen filialımızdıń studenti Suxrab Aminovqa bunnanda jaqsı nátiyjelerge erisiwinde tilekleslik bildirdi.

Soń Qaraqalpaqstan kórkem óner ǵayratkerleri tárepinen tayarlanǵan koncert baǵdarlaması jıynalǵanlarǵa xosh keypiyat baǵıshladı.

Bayram saltanatı dawamında bir tárepte milliy taǵamlar asılsa, ekinsh tárepte filialdıń milliy kiyimlerde kelgen professor-oqıtıwshıları hám student jasları tárepinen tayarlanǵan milliy taǵamlar kórgizbesi shólkemlestirildi.

Student-jaslar tárepinen ótkerilgen qol gúresi, arqan tartıs, lanki sıyaqlı sport oyınlarınıń shólkemlestiriliwi bayram saltanatına ózgeshe sán baǵıshladı.

Soń filial miynet jámááti aǵzaları ushın bayram dasturxanı jayıldı.

Filial Baspasóz xızmeti.