Elimizde sporttı rawajlandırıwǵa qaratılǵan dıqqat-itibardıń nátiyjesinde búgingi kúnde jaslarımız xalıqaralıq sport jarıslarında jaqsı nátiyjelerge erisip kelmekte.

Bunı 2021-2022-oqıw jılında Ózbekstan mámleketlik dene tárbiyası hám sport universiteti Nókis filialına arnawlı grant tiykarında oqıwǵa qabıl etilgen studentimiz Suhrab Aminov mısalınanda kóriwimizge boladı. Suhrab kelesheginen úmit kúttiretuǵın jaslarımızdan biri desek asıra aytqan bolmaymız. Úyinde ata-anasınıń tárbiyası onıń sporttın boks túri menen 10 jasınan baslap shuǵıllanıwına túrtki bolǵan.

Yaǵnıy, ákesi Rashid Seytov sporttıń boks túrinen bir neshe jaslardı tayarlap túrli dárejedegi chempionlar etip shıǵarıp atırǵanlıǵın kórip júrgen balası Suhrabtıńda sporttıń usı túrine kirip keliwine sebepshi boladı hám ózi balasına ustazlıq etip boks sportınıń álwan túrli sırların úyrete baslaydı.

– Ózińniń balańa ustazlıq etiw belgili dárejede qıyın is eken. Sebebi, sport jarıslarında ózińniń perzentińniń qarsılasınan jeńiliwi, yamasa, jaraqat alǵanın kórip turıw áke ushın qattı qıyın. Durıs, shákirtleriń jarısta qarsılasınan jeńilse, yamasa jaraqat alsa qıynalasań, biraq, perzentińniń sonday jaǵdayǵa túskenin kóriw, bári-bir, áke ushın qıyın boladı eken. Balam sporttıń bul túrine 10 jasında kirip kelgen bolsa, házir erisip atırǵan tabısları kóz tiymesin jaman emes. Ózbekstan saylandı komandası aǵzası, óziniń salmaq kategoriyasında Ózbekstanda birinshi sanlı sportshı esaplanadı.

Endi on segiz jastı toltırǵan sportshımız Qaraqalpaqstan hám Ózbekstan kóleminde ótkerilgen bir qatar jarıslarda sıylı orınlardı iyelep kelmekte. Suhrab usı jıldıń 1-14-mart kúnleri Iordaniya poytaxtı Amman qalasında boks boyınsha jas óspirimler hám jaslar arasında ótkerilgen Aziya chempionatında 60 kilogramm salmaq kategoriyasında qatnasıp sıylı 3-orındı alıwǵa miyasar boldı.

– Hár bir nárseniń ózine tán qıyınshılıǵı, ózine tán mashaqatı boladı eken. Meniń sportqa kirip keliwim hám jaqsı nátiyjelerge erisiwimde birinshi orında trenerim, ákemniń miynetleri úlken dep bilemen. Sonıń menen birge ózimniń turaqlı túrde tınımsız alıp barǵan miynetlerimniń nátiyjesi dep bilemen. Hár bir jarısqa túskenimde eń birinshi náwbette trenerimniń úyretken hár bir usılınan yaǵnıy ámellerinen nátiyjeli paydalanıwǵa háreket etemen hám basım kópshilik jarısta jeńiske erisip jaqsı nátiyje kórsetip kelmektemen. Maqsetim Ózbekstan mámleketlik dene tárbiyası hám sport universiteti Nókis filialında bilim berip atırǵan professor-oqıtıwshılardan teoriyalıq hám ámeliy bilimlerdi tolıq meńgerip usı sport túriniń jetik mamanı bolıw hám ózimniń úyrengen bilim sırlarımdı ámelde qollanıw.

Álbette, bizde óz ornında Suhrabtan keleshekte jaqsı sportshı jetilisip shıǵadı dep oylaymız.

ÓzMDTSU Nókis filialı Baspasóz xızmeti.