Alǵan teoriyalıq bilimlerdi ámeliyatta qollanıw, ustaz pedagoglardıń sabaqlarına kirip tájiriybe arttırıw, pedagogikalıq hám psixologiyalıq iskerlikte oqıwshılar menen islesiw sırların úyreniw, bolajaq oqıtıwshılar hám psixologlar ushın oǵada áhmiyetli sanaladı.

Usı maqsette Ózbekstan mámleketlik dene tárbiyası hám sport universiteti Nókis filialı «Sport túrleri» fakulteti «Psixologogiya (sport)» tálim baǵdarınıń 3-kurs studentleri Nókis Olimpiya rezervleri kolledjinde 2022-jıl 7-fevral sánesinen baslap mámleketlik pedagogikalıq ámeliyattı ótep kelmekte.

Studentler ámeliyat dáwirinde sport psixologı bolıwdıń qanday mashaqatlı hám juwapkershilikli kásip ekenligin tereńnen sezinip atır. Ámeliyattıń dáslepki kúnleri sportshılarǵa psixologiyalıq treningler ótiwde albırawshılıqlar bolǵan bolsa, búgingi kúnde topar ámeliyatshı studentler pedagogikalıq processke maslasıp joqarı bilimlendiriwde alǵan teoriyalıq bilimlerin tájiriybede qollanbaqta. Kóp oqıw, tınımsız izleniw, jańa áwlad hám shet el ádebiyatlarınan, zamanagóy málimleme texnologiyalarınan paydalanıw, turaqlı túrde óz ústinde islew, izleniw, búgingi kún pedagog-oqıtıwshısı ushın qoyılatuǵın joqarı talaplardan bolıp esaplanadı.

Pedagogikalıq ámeliyat dáwirinde ámeliyatshı studentler tárepinen hár qıylı qızıqlı treningler, jeke hám toparlı sáwbetler shólkemlestirilip, bul treninglerge  ámeliyatshı studentler menen birge, «Sport túrleri» fakulteti dekanı R.Shaniyazov, kafedra baslıǵı A.Elmuratova, ámeliyat basshıları T.Arzımbetov hám kolledj oqıtıwshılarıları qatnasıp, ámeliyatshı studentlerge ózleriniń pedagogikalıq is tájiriybelerinen kelip shıqqan halda óz másláhátlerin berip kelmekte. Sonday-aq, ayırım ámeliyatshı studentler tárepinen shólkemlestirilgen trening hám sáwbetler basqa ámeliyatshı talabalar ushın úlgili sabaq dárejesinde alıp barıldı.

Sonıń menen birge bayram sánelerine arnalǵan keshelerge kolledj oqıwshıların tayarlawda ámeliyatshı studentler jaqınnan járdem berip kelmekte. Ámeliyat dawamında kolledjdiń sport psixologları Gúlnigar Abdukadirova, Farida Rejepovalar studentlerdiń tájiriybe arttırıwına ózleriniń pedagogikalıq tájiriybesi menen metodikalıq usınısların bermekte.

Timur Jumabaev,

ÓzMDTSU Nókis filialı «Dene tárbiyası teoriyası hám gumanitar pánler» kafedrası oqıtıwshısı, ámeliyat basshısı.