Sport salamatlıq hám tınıshlıq elshisi. Sport penen shuǵıllanǵan hár qanday adam fizikalıq jaqtan salamat bolatuǵınlıǵın hámmemiz jaqsı bilemiz. Sporttıń insan salamatlıǵı ushın jaqsı tárepleri barlıǵın tolıq túsingen Ózbekstan mámleketlik dene tárbiyası hám sport universiteti Nókis filialı «Sport túrleri» fakulteti «Basketbol» qánigeliginiń 4-kurs studenti Dilnuza Qarlıbaevada kishkeneliginen sport penen turaqlı shuǵıllanıp kelmekte.
Dilnuza búgingi kúnde trenerlerinen úyrengenlerin filialdaǵı professor-oqıtıwshılardan alǵan teoriyalıq hám ámeliy bilimleri menen tikkeley bayıtıp barmaqta. Zamanlasımızdıń tarawda erisip atırǵan tabıslarıda tilge tiyek etip aytarlıqtay jetiskenlikleri bar. Yaǵnıy, ol usı kúnge shekem bir qatar sport jarıslarında qatnasıp jaqsı nátiyjelerge erisip kelmekte. Dilnuzanıń sport oyınlarındaǵı talapshanlıǵı hám erisip atırǵan nátiyjeleri esapqa alınıp Ózbekstan Respublikası Turizm hám sport ministrliginiń 2021-jıl 2-noyabr kúngi 716-sanlı buyrıǵı menen sporttıń basketbol túri boyınsha Ózbekstan sport ustası dárejesi berildi.

Ózbekstan sport ustası guwalıǵı Dilnuza Qarlıbaevaǵa Qaraqalpaqstan Respublikası Sporttı rawajlandırıw ministri Rustamjon Kazakov tárepinen saltanatlı ráwishte tapsırıldı.

– Sportta erisken tabıslarımnıń hámmesi ata-anamnıń durıs kórsetken jol-jobası, professor-oqıtıwshılarımnıń hám ustaz-trenerlerimniń teoriyalıq-ámeliy jaqtan bergen bilimleriniń nátiyjesi dep bilemen. Bunıń ushın hámmesinen sheksiz minnetdarman. Keleshekte ustazlarımnıń maǵan bergen isenimin tolıq aqlayman dep bekkem isenim menen ayta alaman,-deydi biz benen sáwbeti barısında Dilnuza Qarlıbaeva.

Álbette, bizde óz ornında zamanlasımızdın aldaǵı sport jarıslarında jaqsı nátiyjelerge erisip, mámleketlik ataqlar nesip etiwine tileklespiz.

 Tabısıń joldasıń bolsın Dilnuza!

Roza Yusupova,

ÓzMDTSU Nókis filialı 2-kurs studenti.