Mámleketimizdiń innovaciyalıq potencialın jánede rawajlandırıwdı maqset etken, kreativ pikir júritetuǵın jaslar, professor-oqıtıwshılar, jas ilimpazlar hám ilimiy izertlewshilerdiń, pedagog qánigeler dıqqatına!

 “El-yurt umidi” fondı sırt el mámleketleriniń abıraylı universitetleri hám ilimiy oraylarında bakalavriat, magistratura hám doktoranturada bilim alıw ushın 2022-jılǵı 2-stipendiya tańlawın daǵaza etedi!

“Jańa Ózbekstannıń 2022-2026-jıllarǵa móljellengen rawajlanıw strategiyası”nda “El-yurt umidi” fondı arqalı erkin hám dóretiwshilik pikirleytuǵın jaslardı abıraylı shet el joqarı oqıw orınlarına oqıwǵa jiberiw kólemin 2 esege kóbeytiw wazıypası belgilengen.

Sol sebepli, “El-yurt umidi” fondı Ózbekstan Respublikası ushın tómendegi tarawlar, atap aytqanda:

– kosmik texnologiyalar, nanotexnologiyalar, IT hám nomerlestiriw, jasalma intellekt tarawları;

– atom hám quyash energetikası hámde energiyanıń tiklenetuǵın dereklerinen paydalanıwdıń basqa innovaciyalıq baǵdarları;

– densawlıqtı saqlaw, farmacevtika, telemedicina, virusologiya, mikrobiologiya, immunologiya tarawları;

– elektroenergetika, neft-gaz, neft-ximiya, ximiya, metallurgiya salasınıń baslı tarmaqları;

– mashinasazlıq, avtomobil, elektrotexnika, toqımashılıq hám ónimlerdi standartlastırıw baǵdarları;

– tábiyiy resurslardan aqılǵa muwapıq paydalanıw, suw tejewshi texnologiyalardı keńnen engiziw, sharwashılıq sıyaqlı agrar tarawdıń zárúrli tarmaqları hám basqa qánigelikler ushın 306 orınǵa móljellengen ashıq stipendiya tańlawların daǵaza etedi!

 “El-yurt umidi” fondı 2022/2023 oqıw jılı ushın eń abıraylı shet el mámleketlerde:

 * bakalavriat tálim baǵdarlaması ushın 51 orın,

 * magistratura tálim baǵdarlaması ushın 145 orın,

 * doktorantura tálim baǵdarlaması ushın 110 orın stipendiyalar ajıratıwın xabar beredi.

Usınıń menen birge, Ózbekstan Respublikası Prezidentiniń 2022-jıl 7-marttaǵı “Shańaraq hám hayal-qızlardı sistemalı qollap-quwatlawǵa baylanıslı jumıslardı jáne de jedellestiriw ilajları haqqında”ǵı PF-87-sanlı Pármanına tiykarlanıp hayal-qızlardı shet el joqarı bilimlendiriw mákemeleriniń bakalavriat tálim baǵdarlaması boyınsha 50 orın, magistratura tálim baǵdarlaması boyınsha 10 orın, jámi 60 qosımsha orınlar ajratıladı.

Barlıq tálim baǵdarlaması boyınsha mayıplıǵı bolǵan jaslarǵa ayrıqsha itibar qaratıladı.

 Eger, siz joqarı intellektuallıq potencialǵa iye, zamanagóy hám kreativ pikir júritetuǵın, mámleket ekonomikası hám ilimine innovaciyalıq ideyalar hám texnologiyalar alıp kiriw hámde onı cifrlı tiykarda qayta qáliplestiriw tiykarında rawajlandırıwdı óz aldıńızǵa maqset etip qoyǵan bolsańız – bul múmkinshilik, áyne siz ushın!

Talabanlardıń hújjetleri 2022-jıl 15-aprelden – 15-mayga shekem, respublikanıń barlıq aymaqları wákilleri ushın birden-bir tártip hám teń múmkinshilik tiykarında, onlayn rejimde hám elektron tárizde qabıl etiledi.

Tańlap alıw basqıshları 2022-jıl 15-maydan – 15-iyunǵa shekem dawam etedi.

Tańlap alıw basqıshına tiyisli barlıq maǵlıwmatlar “El-yurt umidi” fondınıń www.eyuf.uz saytı arqalı tolıq járiyalap barıladı.

Talabanlar ushın barlıq zárúr maǵlıwmatlar Fondtıń Onlayn hújjet tapsırıw platformasinda tolıq kórsetip berilgen: http://admission.eyuf.uz

Búgingi kúnde 300 danadan artıq stipendiatlarımız AQSh, Ullı Britaniya, Germaniya, Franciya, Kanada, Yaponiya, Ispaniya, Qubla Koreya hám basqa rawajlanǵan mámleketlerdiń eń abıraylı bilimlendiriw hám izertlew, innovaciya hám óndirislik orınlarda bilim almaqta.

“El-yurt umidi” fondı jurtımızdiń úmiti, isenimi hám súyenishi bolǵan siz jaslardı kútip qaladı!!!