Ózbekstan Respublikası Ministrler Kabinetiniń 2018-jılı 13-noyabr kúni 924-sanlı qararı menen Qaraqalpaqstan Respublikasında dene tárbiyası hám sporttı ǵalabalıq túrde rawajlandırıw, ásirese,  jaslar arasında salamat turmıs tárizin úgit-násiyatlaw ushın zárúr sharayatlar jaratıw,  xalıqaralıq sport jarıslarında múnásip qatnasa alatuǵın,  dene tárbiyası hám sport tarawında sapalı joqarı tálimdi ámelge asırıw arqalı hár tárepleme rawajlanǵan,  ruwxıy jetik,  erkin pikirlew qábiletine iye,  jámiyettiń ilimiy-texnikalıq, social-ekonomikalıq hám mádeniy rawajlanıwın támiyinleytuǵın joqarı maǵlıwmatlı básekige shıdamlı qánigelerdi tayarlaw maqsetinde Ózbekstan mámleketlik dene tárbiyası hám sport universiteti Nókis filialı shólkemlestirilgen edi.

      Filial shólkemlestirilgen oqıw jılında kórkem gimnastika, dzyu-do, basketbol, voleybol, eskek esiw, erkin gúres, mektepke shekemgi hám baslawısh tálimde dene tárbiya hám sport kúndizgi tálim baǵdarlarına abiturientlerden hújjetlerin qabıllaǵan bolsa, al, arnawlı sırtqı bólimge basketbol, voleybol, kórkem gimnastika, dzyu-do, erkin gúres baǵdarlarına abiturientlerden hújjetler qabıl etilgen edi.

     Búgin Ózbekstan mámleketlik dene tárbiyası hám sport universiteti Nókis filialın 2021-2022-oqıw jılında tabıslı tamamlap atırǵan kúndizgi hám arnawlı sırtqı bólim pitkeriwshilerine diplom tapsırıw saltanatlı keshesi bolıp ótti.

      Ilajdı filialdıń «Sport túrleri» fakulteti dekanı R.Shaniyazov ashtı hám basqarıp bardı. Onnan soń Qaraqalpaqstan Respublikası Sporttı rawajlandırıw ministriniń orınbasarı A.Allanazarov, filial direktorı Bayram Mambetov, taraw qánigeleri hám miynet nuranıyleri shıǵıp sóylep, oqıw ornınıń tariyxındaǵı dáslepki pitkeriwshilerdi  qızǵın qutlıqlap, olardıń aldaǵı jumıslarında tabıslar tiledi.

    Ilaj sońında filial pitkeriwshileride sózge shıǵıp, oqıw dáwiri barısında tınımsız, jalıqbastan tálim-tárbiya bergen professor-oqıtıwshılarǵa ózleriniń sheksiz minnetdarshılıǵın bildirdi.

   Keleshekte filialımızdı tabıslı tamamlap saltanatlı ráwishte diplomların qollarına alıp atırǵan pitkeriwshilerimiz sporttı rawajlandırıwda ózleriniń úleslerin qosadı dep bekkem isenemiz.

 

 Ilaj sońında pitkeriwshilerge diplomlar saltanatlı jaǵdayda tapsırıldı.

Filial Baspasóz xızmeti.