Ózbekstan Respublikası mámleketlik joqarı bilimlendiriw mákemelerine oqıwǵa qabıl etiw barısın muwapıqlastırıw boyınsha mámleketlik komissiyasınıń 2022-jıl 2-iyuldaǵı 1-sanlı bayanlaması menen Ózbekstan mámleketlik dene tárbiyası hám sport universiteti Nókis filialına 2022-2023-oqıw jılı ushın kúndizgi tálim baǵdarına 18 sport iskerligi hám 2 tálim jónelisine jámi 140 kvota, al sırtqı tálim baǵdarına 18 sport iskerligine jámi 75 kvota ajratılǵan edi.

Bunnan tısqarı Ózbekstan Respublikası mámleketlik joqarı bilimlendiriw mákemelerine oqıwǵa qabıl etiw barısın muwapıqlastırıw boyınsha mámleketlik komissiyasınıń 2022-jıl 2-iyuldaǵı 1-sanlı bayanlaması menen Respublika joqarı bilimlendiriw mákemelerine abiturientlerdi oqıwǵa qabıl etiw ulıwma sanına salıstırmalı túrde mayıplıǵı bolǵan shaxslar ushın qosımsha eki procentli, yaǵnıy 5 orın, «Mehriybanlıq úyi» hám Balalar úyi pitkeriwshileri bolǵan shın jetimler, SOS-balalar máhálleleri hám shańaraqlıq balalar úyleri pitkeriwshileri, sonday-aq, qáwenderlikke yaki shańaraq tárbiyasına alınǵan balalar (jigirma bes jasqa tolmaǵanlar) ushın qosımsha 1 procentli mámleketlik grantı tiykarında 2 kvota, keminde bes jıllıq is stajına iye bolǵan hayal-qızlar ushın tólemli-shártnama tiykarında 3 kvota, Ózbekstan Respublikası Qurallı Kúshleri qatarında múddetli áskeriy xızmetti ótep komandirleriniń usınısına iye bolǵanlar ushın bakalavriattıń kúndizgi tálim forması boyınsha bólek bes procentli qosımsha 7 kvota, mámleketlik grant tiykarında joqarı bilimlendiriw mákemelerinde ulıwma belgilengen qabıllaw kórsetkishlerine salıstırmalı huqıqbuzarlıq profilaktikası hám jınayatshılıqqa qarsı gúresiwde múnásib úles qosqan, xızmet yaki ilimiy iskerligi joqarı nátiyjelerge erisken ishki isler uyımlarınıń ámeldegi xızmetkerleriniń perzentleri ushın qosımsha bes procentli mámleketlik grantı tiykarında 2 kvota, sonday-aq, bajıxana xızmetine salmaqlı úles qosqan, jumıs barısında málim bir nátiyjege erisken, bajıxana uyımlarında xızmet etip atırǵan ámeldegi xızmetkerlerdiń perzentleri ushın qosımsha eki procentli mámleketlik grantı tiykarında 1 kvota, Ózbekstan Respublikası Qurallı Kúshleri qatarında múddetli áskeriy xızmetti ótep, áskeriy bólim komandirleriniń usınısına iye bolǵanlar ushın bakalavriat baǵdarınıń sırtqı tálim forması boyınsha tólemli-shártnama tiykarında bólek bes procentli qosımsha qabıllaw kórsetkishleriniń joqarı bilimlendiriw mákemeleri kesiminde 4 kvota ajıratılǵan edi.

Usı joqarıda kórsetilgen kvota ushın kúndizgi tálim baǵdarına 458, sırtqı tálim baǵdarına 455, jámi 913 abiturientten Ózbekstan mámleketlik dene tárbiyası hám sport universiteti Nókis filialına 2022-2023-oqıw jılı ushın  hújjetler qabıl etildi.

Usı jıldıń 30-iyul sánesinen 8-avgust kúnleri aralıǵında bolıp ótken kásiplik (dóretiwshilik) imtixanlarına 821 abiturient qatnastı.

Sonday-aq, sport túrleri boyınsha hújjet tapsırǵanlar arasınan altı imkaniyatı sheklengen abiturientlerden belgilengen tártipte kásiplik (dóretiwshilik) imtixanların tapsırdı.

Hár kúni kásiplik (dóretiwshilik) imtixanlar baslanıwınan aldın abiturientler hám olardıń ata-analar menen kásiplik (dóretiwshilik) imtixan qaǵıydaları menen tanıstırılıp barıldı.

Filialdıń Baspasóz xızmeti.