Ózbekstan mámleketlik dene tárbiyası hám sport universiteti Nókis filialına 2022-2023-oqıw jılında 1-kursqa studentlikke qabıl etilgen studentlerdiń ata-anaları menen ushırasıw bolıp ótti.

   Ushırasıwdı filialdıń Jaslar menen islesiw, ruwxıylıq hám aǵartıwshılıq bólimi baslıǵı B.Sabirov ashtı hám basqarıp  bardı hám ol óz sózinde dáslep ata-anaların perzentleriniń studentlikke qabıl etilgenligi menen shın júrekten qutlıqladı.

   Onnan soń shıqqan direktor orınbasarları, bólim baslıqları, dekan, dekan orınbasarları hám tyutorlar sózge shıǵıp, olar birinshi náwbette Ózbekstan Respublikası Prezidenti tárepinen elimizdiń erteńgi keleshegi bolǵan jaslardıń joqarı oqıw orınlarında tıyanaqlı bilim alıwları ushın jaratıp atırǵan imkaniyatları hám usı baǵdarda qabıl etilip atırǵan Párman hám qararlardıń mazmun-mánisine, jaslar turmısında tutatuǵın áhmiyetine, filialda studentlerdiń tıyanaqlı bilim alıwları ushın jaratılǵan múmkinshilikleri menen jaqınnan tanıstırıldı. Sonday-aq, student-jaslardıń sabaqtan bos waqıtların mazmunlı ótkeriw maqsetinde oqıw ornında háreket etip túrǵan sport sekciyaları, dógerekler hám klublar haqqında maǵlıwmatlar berip ótti.

   Bunnan soń oqıw ornınıń ishki tártip qaǵıydaları, studentlerdiń oqıwǵa qatnası, oqıw barısı, kredit mudel sisteması, mámleketlik shártnama tiykarında tólemli kontraktke oqıwǵa kirgen studentlerdiń ata-anaları ushın húkimetimiz tárepinen belgilep berilgen banklerden kredit alıw tártibi, sociallıq járdemge mútáj shańaraqlardıń perzentleri ushın jaratılǵan jeńillikler boyınsha maǵlıwmatlar berip ótti.

   Ulıwma ata-analar fillialdıń ishki imkaniyatı menen tolıq tanıstırıldı.

   Ushırasıw barısında ata-analar oqıw procesi menen baylanıslı ózlerin qızıqtırǵan sorawlarına juwaplar aldı.

Filial Baspasóz xızmeti.