Respublikamızda basketbol sport túrin rawajlandırıw hám ǵalabalıǵına erisiw, sport sheberligin jetilistiriw, kúshli sportshılardı anıqlaw hám Ózbekstan kubogina nátiyjeli qatnasıw, Qaraqalpaqstan Respublikası saylandı komandasın muwapıqlastırıw, salamat turmıs tárizin qáliplestiriw, basketbol menen shuǵıllanıwshılar sanın kóbeytiw hám qızıqtırıw maqsetinde Sporttı rawajlandırıw ministrligi baslaması menen Basketbol federaciyası hám Respublika oyın túrleri hám jeńil atletika boyınsha qánigelestirilgen sport mektebi menen birgelikte basketbol boyınsha er balalar arasında Qaraqalpaqstan Respublikası kubogi bolıp ótti.

Basketbol boyınsha er balalar arasında bolıp ótken Qaraqalpaqstan Respublikası kubogine Ózbekstan mámleketlik dene tárbiyası hám sport universiteti Nókis filialınan «Aral» SK-1 hám «Aral» SK-2 komanda aǵzalarıda belsene qatnastı.

-Jarısqa hár bir komanda aǵzaları jaqsı tayarlıqlar menen kelgenligi oyın barısında anıq sezilip turdı. Lekin, kúshliden kúshli shıǵatuǵınlıǵı hám álbette, jeńimpaz bolıw, bul jarıstıń ózine tán qaǵıydası. Búgingi bolıp ótken jarısta da jeńimpaz bolǵan hám jeńiliske ushıraǵan komandalar bar,-deydi «Aral» SK-1 komandası aǵzası Erpolat Dúysenbaev.

Respublikamızdıń barlıq qala hám rayonlarınan jıynalǵan kúshli komanda aǵzaları Respublika oyın túrleri hám jeńil atletika boyınsha qánigelestirilgen sport mektebinde bolıp ótken  jarıs sońında filialdıń «Aral» SK-1 komandası 1-orındı iyelep kubogitıń Nawayı wálayatında bolıp ótetuǵın úshinshi basqıshına jollamanı qolǵa kirgizdi.

Sportshılardı jarısqa T.Mambetjumaev hám A.Avezbaevlar tayarladı.

Bilial Baspasóz xızmeti.