«1-oktyabr – Muǵallimler hám oqıtıwshılar kúni» bayramı qarsańında Ózbekstan mámleketlik dene tárbiyası hám sport universiteti Nókis filialında bir neshe jıllardan berli jemisli miynet etip kiyatırǵan professor – oqıtıwshılar «Jeke gúres hám tábiyiy pánler» kafedrası oqıtıwshısı, biologiya ilimleriniń kandidatı Roza Reymova, «Dene tárbiyası teoriyası hám tábiyiy pánler» kafedrası baslıǵı, psixologiya ilimleri boyınsha filosofiya doktorı, docent Aysulıw Elmuratova, «Oqıw metodikalıq bólimi» baslıǵı, biologiya ilimleri boyınsha filosofiya doktorı Dawletbay Qoщanov hám «Jaslar menen islesiw, ruwxıylıq hám aǵartıwshılıq isleri boyınsha» dekan orınbasarı Qulmurat Kenjebaevlar «Kóp jıllıq jemisli hám hadal miyneti hámde óz xızmet wáziypasına bolǵan sadıq xızmetleri» ushın Ózbekstan Respublikası Joqarı hám orta arnawlı bilimlendiriw ministrliginiń Húrmet jarlıǵı menen sıylıqlandı.

    Filialda professor – oqıtıwshılarǵa ministrliktiń Húrmet jarlıǵın saltanatlı túrde tapsırıw máresimi bolıp ótti.

    Máresimdi filial direktorı B.Mambetov ashtı hám propessor – oqıtıwshılardı kásiplik bayramı menen qızǵın qutlıqladı.

   Soń joqarı bilimlendiriw tarawında jemisli miynet etip atırǵan filialdıń – professor oqıtıwshılarına «Kóp jıllıq jemisli hám hadal miyneti hámde óz xızmet wáziypasına bolǵan sadıq xızmetleri» ushın Ózbekstan Respublikası Joqarı hám orta arnawlı bilimlendiriw ministriniń jeke imzası menen kelgen Húrmet jarlıǵı óz iyelerine saltanatlı túrde tapsırıldı.

    – Men usı kúnge shekem islegen miynetlerim ushın ministrdiń atınan Húrmet jarlıǵın alaman dep hesh oylaǵan joq edim. Bul men ushın kútilmegen, úlken sawǵa boldı. Bizlerdiń joqarı bilimlendiriw tarawındaǵı kishkene miynetimizdi «1-oktyabr – Muǵallimler hám oqıtıwshılar kúni» bayramı qarsańında joqarı bahalap Húrmet jarlıǵı menen sıylıqlap atırǵan Joqarı hám orta arnawlı bilimlendiriw ministrine jeke ózimniń hám filialımızdıń miynet jámááti atınan sheksiz minnetdarshılıǵımızdı bildiremen. Bul Húrmet jarlıǵı biz filial jámááti prafesor – oqıtıwshılarına úlken bayram sawǵası bolıw menen birge kásibimizge degen juwapkershiliktide júkleydi dep oylayman, – deydi «Jeke gúres hám tábiyiy pánler» kafedrası oqıtıwshısı, biologiya ilimleriniń kandidatı Roza Reymova.

    Haqıyqatında oqıtıwshınıń miyneti onıń tálim – tárbiya berip atırǵan oqıwshılarınıń jetiskenliginde kórinedi. Búgingi kúnde filialda jaqsı nátiyjelerge erisip xalıqaralıq maydanlarda elimiz bayraǵın bálentlerge kóterip júrgen studentler basım kópshilikti quraydı. Álbette, studentlerdiń tıyanaqlı bilim alıw menen birge ózleri mehir qoyǵan sport túrlerinen jaqsı nátiyjelerge erisiwinde filialdıń professor – oqıtıwshılarınıń miynetleri ayrıqsha.

    – Bul Húrmet jarlıq meniń joqarı bilimlendiriw tarawında qısqa waqıt ishinde islegen hám islep atırǵan miynetime berilgen eń joqarı baha dep bilemen hám ministrimizge ózimniń sheksiz minnetdarshılıǵımdı bildiremen. Házir direktorımız Bayram aǵa Mambetovtıń qolınan Húrmet jarlıǵın alıwdan, eń dáslep, ata-anama qol telefonım arqalı qońıraw etip súyinshisin sorasam, anam biraz waqıtqa shekem hesh qanday úndemey qaldı. Soń anamnan qutlıqlayman balam, tabısıńnıń bası bolsın, izi dawamlı bolǵay, mámleketlik ataqlarǵa ulasın, bul saǵan bildirilgen úlken isenim, endi sen belińdi bekkem buwıp, bul isenimdi aqlawıń kerek balam dep anam qatı quwanıp qaldı. Ata-ana ushın balasınıń jetiskenligin kóriwden artıq baxıt bolmasa kerek. Meni usınday sıylıqqa usınǵan filial jámátine sheksiz minnetdarshlıǵımdı bildiremen. Men ilim doktorları, professor, akademiklerden alǵan bilimlerimdi filial studentlerine úyretiwden hesh qashan jalıqpayman, – deydi «Jaslar menen islesiw, ruwxıylıq hám aǵartıwshılıq isleri boyınsha» dekan orınbasarı Qulmurat Kenjebaev.    

    Bizde óz ornında profesor – oqıtıwshılarımızdıń miynetleri ushın Ózbekstan Respublikası Joqarı hám orta arnawlı bilimlendiriw ministrligi tárepinen brilgen Húrmet jarlıǵı menen filial miynet jámááti atınan qızǵın qutlıqlaymız hám elimizdiń ertengi keleshegi bolǵan jaslar tálim – tárbiyasındaǵı mashaqatlı hám maqtanıshlı jumıslarında tawsılmas kúsh-quwat tileymiz.

Filial Baspasóz xızmeti.