Qabıl etilgen húkimetlik párman, qarar hám biylikler tiykarında orınlarda bir qatar sport jarısları ótkerilip kelinbekte.

Voleybol sport túrin keń ǵalabalastırıw sport veteranların turaqlı túrde sport hám dene tárbiya shınıǵıwlarına tartıw, olar arasında salamat turmıs tárizin úgit-násiyatlaw maqsetinde Ózbekstan voleybol federaciyası tárepinen usı jıldıń 20-22-oktyabr kúnleri Xorezm wálayatınıń Úrgenish qalasında voleybol boyınsha veteran hayallar arasında II Ózbekstan chempionatınıń II tur oyınları bolıp ótti.

   Onda Ózbekstan mámleketlik dene tárbiyası hám sport universiteti Nókis filialında islewshi hayal-qızlar arasınan dúzilgen saylandı komanda aǵzaları Xorezm, Samarqand, Namangan, Ándijan wálayatlarınan hám Qırǵızstan Respublikasınan kelgen saylandı komanda aǵzaları menen qızǵın bellesiwler alıp bardı.

   Jarıs juwmaǵında filialımız saylandı komandası aǵzaları barlıq qarsılas komanda aǵzalarınan ústin kelip chempionat juwmaǵında sıylı 1-orındı jeńip alıwǵa miyasar boldı.

   Jeńimpaz bolǵan filialımız saylandı komandası aǵzaları shólkemlestiriwshiler tárepinen medal, Diplom hám estelik sawǵaları menen sıylıqlandı.

Filial Baspasóz xızmeti.