“Jasıl mákan” ulıwma milliy joybarı sheńberinde Respublikamız boylap 200 million túp terek nállerin egiw hám sol arqalı qalalarda jasıl maydanlardıń kólemin keńeytiw maqsetinde usı jıldıń 20-oktyabr sánesinen 1-dekabr sánesi aralıǵında “Áhmiyetli 40 kúnlik” dep járiyalanǵan edi.

Usı joybar sheńberinde Ózbekstan Ekologiyalıq partiyası Qaraqalpaqstan Respublikası partiya shólkemi Keńesi atqarıw komiteti tárepinen 20-oktyabr kúni Berdaq atındaǵı qaraqalpaq mámleketlik universitetinde ekologiyalıq estafetaǵa start berilgen edi.

Estafetanıń rámziy beli hám jasıl lentasın Ájiniyaz atındaǵı Nókis mámleketlik pedagogikalıq institutınan búgin Ózbekstan mámleketlik dene tárbiyası hám sport universiteti Nókis filialı saltanatlı túrde qabıl etip aldı. Soń Ózbekstan Ekologiyalıq partiyası Qaraqalpaqstan Respublikası partiya shólkemi Keńesi atqarıw komiteti baslıǵı A.Begimova filialdıń profesor-oqıtıwshıları, texnik xızmetkerleri hám student-jasları menen ushırasıt.

Usırasıw barısında A.Begimova “Jasıl mákan” ulıwma milliy joybarınıń áhmiyeti hám “Áhmiyetli 40 kúnlik” akciyası sheńberinde respublikası aymaǵına neshe túp terek nállerin egiw rejelestirilip atırǵanlıǵı haqqında maǵlıwmat berip ótti.

Bunnan soń ekologiyalıq estafetanıń maqseti haqqında túsinikler berip ótti. Yaǵnıy, respublikamız aymaǵında jaylasqan joqarı oqıw orınları arasında ekologiyalıq estafeta sheńberinde terek nállerin egiw jumısları alıp barılmaqta hám báhár máwsiminde qaysı joqarı oqıw ornınıń aymaǵına egilgen terek nálleri kóp kógerse sol oqıw dárgayı estafeta sheńberinde Ózbekstan Ekologiyalıq partiyası Qaraqalpaqstan Respublikası partiya shólkemi Keńesi atqarıw komiteti tárepinen estelik sawǵaları menen sıylıqlanıwı názerde tutılmaqta.

Búgin 26-oktyabr kúni filial professor-oqıtıwshıları hám student-jasları tárepinen oqıw dárgayınıń átirapına akciya sheńberinde Ózbekstan Ekologiyalıq partiyası Qaraqalpaqstan Respublikası partiya shólkemi Keńesi atqarıw komiteti baslıǵı A.Begimova menen birgelikte terek nálleri egildi.

Soń ekologiyalıq estafetanıń rámziy beli menen jasıl lentası Samarqand mámleketlik veterinariya medicinası sharwashılıq hám biotexnologiyaları  universiteti Nókis filialına saltanatlı túrde tapsırıldı.

Filial miynet jámááti aǵzaları “Jasıl mákan” ulıwma milliy joybarı sheńberinde terek nállerin egiw jumısları dawam etpekte.

Filial Baspasóz xızmeti.