Ózbekstan Respublikası Ministrler Kabinetiniń 2022-jıl 10-noyabr kúngi 49-sanlı májilis protokolı, Qaraqalpaqstan Respublikası Ministrler Keńesiniń 2022-jıl 11-noyabr kúngi 01-0/13-11/596-sanlı májilis protokolları tiykarında respublikamız aymaǵında “15-noyabrden 15-dekabr kúnleri aralıǵı Órt qáwipsizligi aylıǵı” sıpatında belgilendi.

Usı múnásibet penen 22-noyabr kúni Ózbekstan mámleketlik dene tárbiyası hám sport universiteti Nókis filialı hám Qaraqalpaqstan Respublikası Ayırıqsha jaǵdaylar basqarması Nókis qalalıq Ayrıqsha jaǵdaylar bólimi 2-órt qutqarıw bólimshesi menen birgelikte “Student jaslardıń iyis gazinen záhárleniwdiń aldın alıw” atamasında ushırasıw bolıp ótti.

 Ushırasıwdı filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı D.Nurıshov ashtı hám basqarıp bardı. Ol óz sózinde filialda studentler turaq jayınıń joqlıǵı sebepli, ijarada hám jaqın tuwısqanlarınıń úylerinde waqtınsha jasap atırǵan studentler arasında iyis gazinen záhárleniwdiń aldın alıw maqsetinde bul ushırasıwdıń áhmiyeti úlken ekenligine ayrıqsha toqtap ótti. Onnan soń Nókis qalalıq Ayrıqsha jaǵdaylar bólimi 2-órt qutqarıw bólimshesi qutqarıw smena baslıǵı A.Qaljanov sońǵı úsh jıl ishinde gúzi-qısı máwsiminde júz berip atırǵan ayrıqsha jaǵdaylardıń basım kópshiligi iyis gazinen záhárleniw halatları menen baylanıslı ekenligin, sonday-aq, tútin quramında 3 procent, qayta islengen gazde 13 procent, jarılıwshı gazler quramında bolsa, 50/60 procentke shekem iyis gazi bolatuǵınlıǵın maǵlıwmat ushın keltirip ótti.

Bunnan soń student-jaslardı jılıtıw úskenelerinen paydalanǵanda arqayınshılıqqa berilmey sergek bolıwǵa shaqırdı. Soń taraw qánigeleri tárepinen ilaj qatnasıwshılarına kewilsiz jaǵdaylardıń aldın alıw maqsetinde tarqatpa materiallar tarqatıldı.

Ilaj sońında student-jaslar dıqqatına órt shıqqanda, ushqın ushqanda hám iyis gazi menen baylanıslı kewilsiz jaǵdaylar júz bergende qalay háreketleniw kerekligi hám onıń aldın alıw boyınsha kórgizbeli shınıǵıwların kórsetip ótti.
Aylıq sheńberinde shólkemlestirilgen ilaj barısında qatnasıwshılar ózlerin qızıqtırǵan sorawlarına tiyisli taraw qánigelerinen juwaplar aldı.

 Filial Baspasóz xızmeti.