1-dekabr – Qaraqalpaq tiline mámleketlik til biyligi berilgen kún

Ózbekstan mámleketlik dene tárbiyası hám sport universiteti Nókis filialında 1-dekabr – Qaraqalpaq tiline mámleketlik til biyligi berilgeniniń 33 jıllıǵı múnásibeti menen «Til millettiń biybaha ǵáziynesi» atamasında bayram saltanatı ótkerildi.

Bayram saltanatın filialı direktorı, tariyx ilimleriniń kandidatı, docent Bayram Mambetov kiris sóz benen ashtı hám Qaraqalpaqstan Respublikasınıń «Mámleketlik til haqqında»ǵı Nızamı qabıl etilgeniniń 33 jıllıq bayramı menen filial miynet jámáátin hám student-jaslardı qızǵın qutlıqlap, sońǵı jıllarda elimizde ana tilimizdi taza saqlawǵa, onı jáne de bayıtıwǵa mámleketlik siyasat dárejesinde qaratılıp atırǵan itibar haqqında toqtap ótti.

Onnan soń sózge shıqqan bayanatshılar házirgi waqıtta dúnyada jeti mıńǵa shamalas tiller bolǵanı menen, olardıń tek 170 ten aslamı óziniń mámleketlik til statusına iye ekenligin.

Olar arasında qaraqalpaq tiliniń de bar ekenligi maqtanısh penen tilge aldı.

Til – bul xalıqtıń tariyxın, mádeniy miyrasların, turmıs tárizin, úrp-ádet hám salt-dástúrlerin ózinde jámlestirgen biybaha ǵáziyne ekenligin, mámlekettiń jámiyetlik-siyasiy ruwxıy jaqtan rawajlanıwında áhmiyetli orın iyeleytuǵın qádiriyatlardan biri bolıp esaplanatuǵınlıǵın ayrıqsha atap ótti.

Bayram saltanatı barısında filial student-jasları qaraqalpaq jazıwshı-shayırlarınıń ana tilimiz haqqında jazǵan qosıqlarınan oqıp berdi.

Sáne múnásibeti menen filial student-jasları arasında ótkerilgen maqalalar tańlawında jeńimpaz bolǵan studentlerge diplom hám estelik sawǵaları tapsırıldı.

Ilaj Nókis qánigelestirilgen mádeniyat mektebi oqıwshıları hám filial student-jaslarınıń shólkemlestiriwindegi koncert baǵdarlaması menen dawam etti.

Filial Baspasóz xızmeti.