Bársheńizdiń xabarıńız bar Ózbekstan Respublikası joqarı oqıw orınlarında bilim alıp atırǵan student-jaslardıń arasında basqıshpa – basqısh  ótkerilip atırǵan «Universiada – 2022» sport oyınlarında sporttıń  basketbol túri boyınsha Ózbekstan mámleketlik dene tárbiyası hám sport universiteti Nókis filialı er balaları arasınan dúzilgen saylandı komanda aǵzaları aymaqlıq basqıshında barlıq qarsılas komanda aǵzalarınıń ústinen jeńiske erisip finalǵa jollama alǵan edi.

Usı jıldıń 11-14-dekabr kúnleri «Universiada – 2022» sport oyınlarınıń final basqıshı Jizzaq wálayatında bolıp ótti.

Onda filialımız er balaları arasınan dúzilgen saylandı komandamız aǵzaları Tashkent wálayatınan kelgen komanda aǵzaların 53:47 esabı menen,    Ándijan wálayatınıń komanda aǵzaların 72:25 esabı menen, al, Samarqand wálayatınıń komanda aǵzalarınıń ústinen 64:23 esabı menen jeńdi.

Qızǵın bellesiwlerge bay tárizde bolıp ótken jarıs barısında filialımız er balaları arasınan dúzilgen komandamız aǵzaları qarsılas komanda aǵzalarına hesh qanday imkaniyat qaldırmay Qaraqalpaqstan Respublikası tariyxında birinshi márte er balalar arasında sporttıń basketbol túrinen «Universiada» sport oyınlarınıń jeńimpazı boldı.

Jeńimpaz bolǵan komandamız aǵzaları Ózbekstan Respublikası Joqarı hám orta arnawlı bilimlendiriw ministrliginiń medal, Diplom hám estelik sawǵaları menen sıylıqlandı.

Komanda aǵzaların jarısqa professor – oqıtıwshılardan A.Avezbaev, T.Mámbetjumaev hám S.Amaniyazovlar tayarladı.

Filial Baspasóz xızmeti.