Áziz hayal-qızlarımızdı qansha qádirlep ardaqlasaqta arzıydı. Sebebi, olar ana, ómirlik joldas, ajapamız, qarındasımız, jámiyetimizde elimizdiń rawajlanıwında salmaqlı ornı bar mámleketlik isker.

  Búgin Ózbekstan mámleketlik dene tárbiyası hám sport universiteti Nókis filialında 8-mart – Xalıqaralıq hayal-qızlar kúni múnásibeti menen «Dáwir qızları» atamasında kórik tańlawı bolıp ótti.

  Ilajdı filial direktorınıń Jaslar máseleleri, ruwxıylıq hám aǵartıwshılıq isleri boyınsha birinshi orınbasarı Darmenbay Nurıshov kiris sóz benen ashtı hám bárshe hayal-qızlarımızdı bayram menen qızǵın qutlıqladı.

  Soń filialda bilim alıp atırǵan student-qızlardıń arasınan ózleriniń bilimi, talantı hám óneri menen toptı jarıp shıqqan belsendi qızlar tańlaw shártleri tiykarında óz-ara bellesti.

  Qızǵın bellesiwlerge bay tárizde bolıp ótken tańlaw sońında tóreshiler tárepinen 1-orınǵa «Psixologiya (sport)» qánigeliginiń 3-kurs studenti Dinora Ernazarova hám «Voleybol» qánigeliginiń 3-kurs studenti Gúlnaz Urinbaevalar múnásip dep tabıldı.

  Tańlawǵa belsene qatnasqan qatnasıwshılar tóreshiler tárepinen «Eń iybeli qız», «Eń sheber qız», «Eń ziyrek qız», «Eń azada qız», «Eń izleniwsheń qız» hám «Eń pazende qız» nominaciyaları boyınsha sıylıqlandı.

  «Dáwir qızları» kórik tańlawı filial student-jasları tárepinen tayarlanǵan kórkem-óner baǵdarlaması menen dawam etti.

Filial Baspasóz xızmeti.