Shıǵıs xalıqlarınıń jıl bası esaplanǵan 21-mart – Nawrız ulıwmaxalıqlıq bayram tamashaları elimiz boylap dawam etpekte. «Hár kúniń Nawrız bolsın, janajan Ózbekstanım» súreni atamasında búgin 17-mart kúni Ózbekstan mámleketlik dene tárbiyası hám sport universiteti Nókis filialı miynet jámááti aǵzalarıda bayram saltanatın ulıwma xalıqlıq seyil túrinde kóterińkilik jaǵdayında belgilendi.

  Bayram saltanatın filial direktorı B.Mambetov kiris sóz benen ashtı hám bárshe jıynalǵanlardı shıǵıs xalıqlarınıń jıl bası esaplanǵan jańalanıw, miyrim-shápáát hám qádirlew áyyamı Nawrız bayramı menen qızǵın qutlıqlap, bayramnıń insanlardı awızbirshilikke, tatıwlıqqa shaqırıwshı iygilikli tárepleri haqqında aytıp ótti.

 Soń bayram seyili, dáslep, filial professor-oqıtıwshıları hám student-jasları arasınan dúzilgen kamandalar arasında milliy xalıq oyınları bolǵan bektas, arqan tartıs, qol gúresi, lanka, tas kóteriw sıyaqlı sport jarısları menen baslandı hám jeńimpazlar anıqlandı.

 Bayramǵa say tárizde bezetilgen filial imaratı aldındaǵı maydanshada professor-oqıtıwshılar, student-jaslar tárepinen tayarlanǵan hár qıylı xalqımızǵa tán tariyxın, mádeniyatın, úrp-ádet hám dástúrlerin sáwlelendiriwshi milliy miyraslarımız bolǵan milliy taǵamlardıń, ata-babalarımızdan qalǵan úy buyımlarınıń, milliy kiyimler hám ónermentshilik úlgileriniń kórgizbesi orın aldı.

 Bunnan soń filialdıń professor-oqıtıwshıları hám student-jasları arasınan dúzilgen kamandalar arasında milliy xalıq oyınları boyınsha ótkerilgen jarıstıń jeńimpazları sıylıqlandı.

 Soń filialdıń talantlı, ziyrek studentleri milliy kiyimlerde xalıq awız-eki dóretiwshiligi úlgilerin, búgingi kúnge shekem jetip kelgen milliy máresim, dástúrlerimizden kórinisler atqarıp koncert baǵdarlamasın jıynalǵanlardıń názerine usınıldı.

 Filial student-jasları tárepinen teatrlastırılǵan koncert baǵdarlaması bársheniń kewline yosh hám joqarı keypiyat baǵıshladı.

Filial Baspasóz xızmeti.