Usı jıldıń 14-aprel kúni Ájiniyaz atındaǵı Nókis mámleketlik pedagogika institutında Jaslar akademiyası baslıǵı A.Sobirxonovtıń Qaraqalpaqstan Respublikasındaǵı joqarı oqıw orınlarınıń ziyrek student jasları menen ushırasıwı bolıp ótti.

   Ushırasıwda Qaraqalpaqstan Respublikasındaǵı innovaciyalıq joybarlardı finanslıq támiyinlewge qaratılǵan “Start4 region-2023” startap joybarlar tańlawına start berildi. Sonday-aq, ushırasıwda jaslardıń ózleriniń joybarların qalay ámelge asırıwı, tańlawlarǵa qatnasıw tártibi hám qarjılandırıw derekleri haqqında keń maǵlıwmatlar berildi.

   Ushırasıw juwmaǵında “Mirza Uluǵbek miyrasxorları” tańlawınıń Qaraqalpaqstan Respublikası basqıshınıń jeńimpazların sıylıqlaw máresimi de bolıp ótti. Qaraqalpaqstan Respublikası basqıshında jámi 84 qatnasıwshınıń innovaciyalıq ideyalardıń prezentaciyaları bahalaw komissiyası tárepinen múnásip bahalanıp, tańlaw juwmaǵında 20 qatnasıwshı jeńimpaz dep tabıldı. Olardıń qatarında filialdıń “Erkin gúres” tálim baǵdarı 3-kurs studenti P.Pranatdinov jeńimpaz bolıp, Tashkent qalasında bolıp ótetuǵın respublika basqıshına jollama aldı hám Jaslar akademiyasına aǵzalıqqa qabıl etildi.

   Maǵlıwmat ornında sonı aytıp ótiwimiz kerek, 2023-jıldıń 25-mart kúni “Mirza Uluǵbek miyrasxorları” tańlawınıń rayonlıq basqıshı ótkerilip, oǵan filialdan 8 student belsendi qatnasıp, olardan 4 student jeńimpaz bolıp Qaraqalpaqstan Respublikası basqıshına jollama alǵan edi.

Qoblan Mnajatdinov,

Ziyrek studentlerdiń ilimiy izertlew iskerligin shólkemlestiriw bólimi baslıǵı.