Basketbol 3×3 (stritbol) sport oyını usı jılı «Universiada» sport jarıslarına birinshi márte oyınıǵa kirtilgen edi.

   2023 jıldıń 26-30-aprel kúnleri aralıǵında Ándijan qalasında usı sport túrinen «Universiada» sport jarıslarınıń respublikalıq basqıshı bolıp ótpekte.

   Quwanıshlı tárepi sonda tariyxta birinshi márte «Universiada» sport oyınlarında oynalıp atırǵan bul jarısqa Ózbekstan mámleketlik dene tárbiyası hám sport universiteti Nókis filialı student-jasları arasınan dúzilgen Qaraqalpaqstan Respublikasınıń saylandı komandası er balaları arasında bolıp ótken jarısta Buxara, Surxandárya, Nawayı, Tashkent wálayatları hám Tashkent qalasınıń saylandı komandaları ústinen jeńiske erisip «Universiada» sport jarıslarında sıylı 1-orındı iyelep Diplom hám altın medalların qolǵa kirgizdi.

  Saylandı komandanıń bunday nátiyjeni qolǵa kirgiziwinde komanda quramında qatnasqan Ózbekstan mámleketlik dene tárbiyası hám sport universiteti Nókis filialı «Sport túrleri» fakulteti «Basketbol» qánigeliginiń studentleri Sharashenidze Omari, Ubaydullaev Muhammed, Írzabaev Xamidjan, Bekmuratov Nursultan hám olardı jarısqa tayarlaǵan tájiriybeli trener-oqıtıwshılar Temur Mambetjumaev, Aziz Avezbaev, Sipatdin Amaniyazovlardıń miynetlerin ayrıqsha atap ótiwimiz kerek.

  Maǵlıwmat ornında: Stritbol (ing. Streetball) – 1950-jılları AQShda payda bolǵan oyın. Ol ápiwayı basketboldan oyınshılar sanı menen parıq etedi. Bir komanda quramında 4 oyınshı, sonnan 3 oyınshı maydanda oynaydı 1 oyınshı rezervte boladı.

  Stritbol maydanı basketbol maydanınıń yarımı bolıp, eki komanda bir sebetke qaray hujim etedi. Stritbol maydanı “Kort” dep ataladı.

Filial Baspasóz xızmeti.