Usı jıldıń 11-aprel kúni Ózbekstan Respublikası Prezidenti Shavkat Mirziyoev basshılıǵında «Jaslar siyasatı tarawındaǵı jumıslardıń nátiyjeliligin asırıw hám olar menen islesiw sistemasın jánede jetilistiriw is-ilajları boyınsha» video silektor jıynalısında berilgen tapsırmalardı orınlaw maqsetinde Ózbekstan mámleketlik dene tárbiyası hám sport universiteti Nókis filialı direktorı Bayram Mambetovqa Ellikqala rayonında jasawshı jámi 22 waqtınsha jumıssız hám mayıplıǵı bolǵan jaslar atalıqqa biriktirilgen edi.

 Usı atalıqqa biriktirilgen jaslar menen filial direktorınıń ushırasıwları shólkemlestirilip, olar tárepinen bildirilgen mashqalalardı orınlardıń ózinde unamlı saplastırılıw boyınsha belgilengen reje tiykarında sistemalı isler ámelge asırılmaqta.

 Atap aytqanda, filial direktorı Bayram Mambetov awıl puqaralar jıyınları hám mákan puqaralar jıyınlarındaǵı mashqalalar boyınsha islesiw maqsetinde úyme-úy júrip sáwbetlesiwler ótkerdi.

 Sáwbetlesiwler barısında «CHwpon» mákan puqaralar jıyını aymaǵında jasawshı 1999-jılı tuwılǵan I topar mayıplıǵı bolǵan Shaxrux Bekishiv úyine barıp mashqalası úyrenilgende onın mayıplıq arbashasına zárúrligi barlıǵı málim boldı hám oǵan filial direktorı tárepinen elektorlasqan ózi háreketlenetuǵın mayıplıq arbashası tapsırıldı.

 – Aldınları balamdı sırtqa shıǵıp kóshede aylandırıp alıp júriwde biraz qıynalatuǵın edik. El basshılarına raxmet. Sebebi, bizlerdey kewli kemtik, járdemge mútáj insanlardı itibardan shette qaldırmay usınday sawǵalardı berip, bizlerdiń mashaqatımızdı jeńillestirip atırǵanlıǵı ushın sizge, siz arqalı barlıq el basshılarınan minnetdarmız deydi,- Shaxrux Bekishivtiń ata-anası. Bunnan soń usı mákan puqaralar jıyını aymaǵında jasawshı 1994-jılı tuwılǵan II topar mayıplıǵı bolǵan Shaxlo Ataxanovanıń úyine barıp onıń ata-anası menen sáwbetleskende qızınıń tiginshilik penen shuǵıllanıwǵa qızıǵıwshılıǵı bar ekenligi málim boldı hám filial direktorı tárepinen Shoxlonıń bántligin támiyinlep, qosımsha dáramat tabıw deregin jaratıw maqsetinde oǵan «ZOJE» tigiw mashinası tapsırıldı. Sonday-aq, atalıqqa bekitilgen «Istiqlol», «Qabatqala», «Tashkent», «CHwpon» mákan puqaralar jıyını hám «Aqshakól» awıl puqaralar jıyını aymaǵında jasawshı jumıssız hám mayıplıǵı bolǵan jaslardıń dári-darmaq alıp emleniwleri ushın altı jastıń hár birine 2.500 swmnan aqshalay sıylıqlar tapsırıldı.

 Filial direktorı atalıqqa bekitilgen hár bir jas penen sáwbetlesiwler ótkerdi hám olar tárepinen bildirilgen mashqalalardı imkaniyat dárejesinen kelip shıǵıp orınlardıń ózinde saplastırıw múmkinshligi bar ekenligin túsindirip, elimizde insan qádiri hámme nárseden joqarı turatuǵınlıǵın ayrıqsha atap ótti.

Filial Baspasóz xızmeti.