Búgin Nókis qalasında «Oraylıq Aziya pedagogları» xalıqaralıq forumı baslandı.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimizde húrmetli Prezidentimiz basshılıǵında alıp barılıp atırǵan keń kólemli reformalar, tarawǵa qaratılıp atırǵan ayrıqsha itibar haqqında atap ótti.

Haqıyqatında da, ámelge asırılıp atırǵan reformalar nátiyjesinde tálim-tárbiya sistemasın xalıqaralıq standartlar tiykarında rawajlandırıw, oqıw procesine aldınǵı tájiriybeler, innovaciyalıq texnologiyalardı keńnen engiziw, pedagoglardıń jámiyettegi ornı hám abıroyın arttırıw, oqıwshı jaslarǵa zamanagóy bilim hám kásip-óner sırların úyretiw baǵdarındaǵı jumıslar jańa basqıshlarǵa kóterilmekte.

Ótkerilip atırǵan forumda Oraylıq Aziya mámleketleriniń jetekshi pedagogları, bilimlendiriw tarawı pidayıları, Birlesken Milletler Shólkemi, sonday-aq, bir qatar xalıqaralıq shólkemler hám de Kembridj universitetiniń wákilleri qatarında Ózbekstan mámleketlik dene tárbiyası hám sport universiteti Nókis filialı direktorı, professor B.Erimbetovta  qatnaspaqta.

«Turaqlı keleshek – ekologiyalıq tálimnen baslanadı» degen ideya tiykarında ótkerilip atırǵan búgingi Xalıqaralıq forum Oraylıq Aziya mámleketleri arasında bilimlendiriw tarawındaǵı birge islesiwdi jáne de bekkemlewde, pedagoglar ushın tájiriybe almasıw platformasın jaratıwda hám regionallıq bilimlendiriw sistemasın rawajlandırıwda, xalıqaralıq tıǵız birge islesiwlerdi bunnan bılay da keńeytiwde áhmiyetli orın iyeleydi.

©️Qaraqalpaqstan Respublikası Joqarǵı Keńesi málimleme xızmeti.