Ózbekstan Respublikası Joqarı bilimlendiriw, ilim hám innovaciyalar ministrliginiń «2025-jılda ótkeriletuǵın xalıqaralıq hám respublikalıq kólemdegi ilimiy hám ilimiy texnikalıq ilajlar Rejesi»ne muwapıq Ózbekstan mámleketlik dene tárbiyası hám sport universiteti Nókis filialında «Jazǵı olimpiya hám paralimpiya oyınlarına sportshılardı tárbiyalawdıń áhmiyetli mashqalaları hám sheshimleri» atamasında xalıqaralıq ilimiy-ámeliy konferenciyası bolıp ótti.

Konferenciyaǵa elimizdegi joqarı oqıw orınlarınan tısqarı, qońısılas respublikalardıń hám shet ellerdiń abroylı joqarı oqıw orınlarınıń ilimpazları, jas izleniwshileri, magistrantlar hám studentleri qatnastı.

Konferenciyanıń ashılıw máresiminde Ózbekstan mámleketlik dene tárbiyası hám sport universiteti Nókis filialı direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı Gúlmurat Xojametov shıǵıp sóylep, sońǵı jılları pútkil dúnya júzinde bolǵanı sıyaqlı elimizde Prezidentimizdiń basshılıǵında denet árbiyası hám sport tarawın rawajlandırıwǵa ayrıqsha itibar qaratılıp atırǵanın hám usınday qollap-quwatlawlardıń nátiyjesinde mámleketimiz sportshıları tárepinen xalıqaralıq sport arenalarda úlken tabıslar qolǵa kirgizilip atırǵanın aytıp ótti hám tarawdı ele de rawajlandırıw ushın ilim menen tıǵız birge islesiw zárúrligine de toqtap, konferenciyanıń aldaǵı jumıslarına tabıslar tiledi.

Bunnan soń konferenciya óz jumısın basladı. Konferenciyada Abay atındaǵı Qazaq milliy pedagogika universiteti, K.A.Yassawi atındaǵı Qazaq-Túrk xalıqaralıq universiteti, Ózbekstan mámleketlik dene tárbiyası hám sport universiteti, Innovatsion texnologialar universiteti, Ózbekstan mámleketlik dene tárbiyası hám sport universiteti Nókis filialı hám basqada bir qatar joqarı oqıw orınları qatnasıwshıları búgingi kúnniń áhmiyetli máseleleri boyınsha bayanatlar jasadı. Bul boyınsha ilimpazlar hám qánigeler ózleriniń pikirlerin bildirdi.

Konferenciya sońında bayanatshı hám qatnasıwshılar tárepinen bildirilgen pikir hám usınıslardı inabatqa alǵan halda sport oyınlarınıń túrlerin ǵalabalıq rawajlandırıw is-ilájları belgilep alındı.

Belsene qatnasqan izleniwshiler hám student-jaslar filial administraciyası tárepinen sertifikat hám estelik sawǵaları menen sıylıqlandı.

Filial Baspasóz xızmeti.