Ózbekstan mámleketlik dene tárbiyası hám sport universiteti Nókis filialı jaslar arasında sport arqalı doslıq hám awızbirshilikti bekkemlew maqsetinde Ábiw Rayxan Beruniy atındaǵı Úrgensh mámleketlik universitetin menen birgelikte “Sport – doslıq elshisi” temasında sporttıń Mini-futbol, Badminton, Stol tennisi hám Shaxmat túrlerinen doslıq jarısları ótkerdi.

Bunda dáslep filial sporshı studentleri Beruniy atındaǵı Úrgensh mámleketlik universiteti tárepinen saltanatlı túrde kútip alındı.

Student-jaslar arasında salamat turmıs tárizin úgit-násiyatlaw, milletleraralıq tatıwlıq hám doslıqtı bekkemlew, sport arqalı awızbirshilik ruwxın jáne de joqarılatıw maqsetinde shólkemlestirilgen jarıstıń ashılıw máresiminde UrMU birinshi prorektorı D.Ibadullaev, «Sport klub»ı baslıǵınıń orınbasarı M.Rahimov hám filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı G.Xojametov jarıs qatnasıwshılarına áwmetler tiledi.

Jarıs qızǵın bellesiwlerge bay tárizde ótkerildi hám eki joqarı oqıw orınlarınıń studentleri tárepinen tayarlanǵan koncert baǵdarlaması menen dawam etti.

Filial Baspasóz xızmeti.