18-noyabr – Ózbekstan Respublikasınıń Mámleketlik bayraǵı qabıl etilgen kún

Búgin Ózbekstan Respublikası Mámleketlik bayraǵı qabıl etilgenliginiń 35 jıllıǵı múnásibeti menen Ózbekstan mámleketlik dene tárbiyası hám sport universiteti Nókis filialında ilajı bolıp ótti.

Bayram ilajı Ózbekstan hám Qaraqalpaqstan Respublikalarınıń Mámleketlik gimnleri menen baslandı.

Ilajdı Ózbekstan mámleketlik dene tárbiyası hám sport universiteti Nókis filialı Jaslar máseleleri hám ruwxıy-aǵartıwshılıq isleri boyınsha direktordıń birinshi orınbasarı Gulmurat Xojametov kiris benen ashıp berdi hám jıynalǵanlardı qutlı sáne – Mámleketlik bayraq qabıl etilgen kún menen qutlıqladı. Ol óziniń shıǵıp sóylegen sózinde bayraǵımızdıń milliy maqtanısh hám ǵárezsizlik tımsalı sıpatında tutqan ornına, onıń hár bir watanlasımızdıń qálbindegi áhmiyetine toqtap ótti.

Májiliste Berdaq atındaǵı Qaraqalpaq mámleketlik universiteti docenti, yuridika ilimleri kandidati Xojabay Kabulov mámleketlik bayraqtıń jaratılıw tariyxı, ondaǵı belgiler, reńlerdiń mánisi haqqında túsinikler berdi ótti.

Atap ótiliwinshe, Mámleketlik bayraǵımız xalqımızdıń ásirlik arzıw-niyetleri, miynet súygishligi, miymandoslıǵı hám iygilikli maqsetlerin ózinde jámlegen muqaddes tımsal bolıp esaplanadı. Búgingi kúnde ol elimizdegi barlıq mámleketlik uyımlar, bilimlendiriw mákemeleri, xalıqaralıq shólkemler hám sport jarıslarında maqtanısh penen jelbirep, elimizdiń abırayın, xalqımızdıń maqtanıshın bildirip kelmekte.

Ilaj filial studentleri tárepinen tayarlanǵan koncert baǵdarlaması menen dawam etti.

Filial baspasóz xızmeti.