Ózbekstan mámleketlik dene tárbiyası hám sport universiteti Nókis filialında Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupov hám Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovlardıń tuwılǵan kúnleri aldınan “Qaraqalpaq ádebiyatınıń qos bayteregi 96 jasta” atamasında ádebiy keshe bolıp ótti.

Ádebiy keshege xalqımızǵa belgili jazıwshı-shayırlar hám jurnalistler, filial professor-oqıtıwshıları, studentler qatnastı.

Kesheni Jaslar menen islesiw, ruwxıylıq hám aǵartıwshılıq bólimi baslıǵı Atabek Meńlimuratov kiris sóz benen ashıp berdi hám ilaj qatnasıwshıların kelgen miymanlar menen tanıstırdı.

Sózge shıqqanlar Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupov hám Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovlar menen birge islegen dáwirlerin eske aldı. Olardıń qaraqalpaq ádebiyatına qosqan úlesi, ómiri hám dóretiwshiligi haqqında keń túrde aytıp berdi.

Studentler Ózbekstan Qaharmanlarınıń qáleminen dóregen shıǵarma hám qosıqlarınan úzindiler oqıp berdi.

Ilaj qaraqalpaq kórkem-óner ǵayratkerleri, Esjan baqsı atındaǵı 1-sanlı kórkem óner hám muzıka mektebi hám Nókis qalalıq 1-sanlı ulıwma bilim beriw mektebi oqıwshıları, filial studentleri atqarıwındaǵı koncert baǵdarlaması menen dawam etti.

Ádebiy kesheniń kóterińki hám shólkemleskenlik ruwxta ótiwinde salmaqlı úles qosqanlar filial administraciyası tárepinen Minnetdarshılıq xatı menen sıylıqlandı.

Filial Baspasóz xızmeti.