Ózbekstan mámleketlik denetárbiya hám sport universitetiniń Nókis filialında 9-dekabr – Xalıqaralıq korrupciyaǵa qarsı gúresiw kúnine baǵıshlanǵan ilaj ótkerildi.

Ilajda tiykarınan, usı jıl 4-oktyabrdegi «Ózbekstan Respublikasınıń Jınayat kodeksine hám Ózbekstan Respublikasınıń Hákimshilik juwapkershilik haqqındaǵı kodeksine ózgerisler kirgiziw haqqında»ǵı hám «Ózbekstan Respublikasınıń Hákimshilik juwapkershilik haqqındaǵı kodeksine qosımsha hám ózgerisler kirgiziw haqqında»ǵı Ózbekstan Respublikasınıń nızamları, sonday-aq, korrupciya hám tarawlarda korrupciyanıń aldın alıw baǵdarında ámelge asırılıp atırǵan jumıslar tuwralı maǵlıwmatlar berildi.

Qaraqalpaqstan Respublikası Ádillik ministrliginiń qánigesi B.Seytnazarov, «Wzenergoinspekciya»nıń Qaraqalpaqstan Respublikası aymaqlıq bóliminiń bas qánigesi B.Zarimov, Nókis qalası prokurorınıń járdemshisi J.Ajbanbetova hám basqalar shıǵıp sóylep, usı nızamlarǵa muwapıq kirgizilgen ózgerisler hám qosımshalar tuwralı túsinikler berip, áhmiyetine toqtap ótti.

Bunnan bılay, usı nızamǵa muwapıq, Hákimshilik juwapkerlik haqqındaǵı kodekske jarasqanlıǵı múnásibeti menen hákimshilik juwapkershilikten azat etiw institutı kirgizilgen. Oǵan bola, kodekstiń bir qatar statyalarında názerde tutılǵan hákimshilik huqıqbuzarlıqlardı islegen adam, eger ol óz ayıbın moyınlasa, jábirleniwshi menen jarassa hám jetkerilgen zıyandı saplastırsa, hákimshilik juwapkershilikten azat etiliwi múmkin.

Jábirleniwshi yamasa onıń nızamlı wákili jarasıw haqqındaǵı arzasın is wákillikli uyımlar tárepinen kórilip atırǵan waqıtta, sonday-aq, sud dodalawınıń qálegen basqıshında, biraq, sud qararı shıqpastan aldın beriwi múmkin. Huqıqbuzarlıqtı bir jıl ishinde qaytadan islegen adam táreplerdiń jarasıwı múnásibeti menen juwapkershilikten azat etilmeydi.

Kirgizilgen ózgerislerge muwapıq, hákimiyat wákiline yamasa puqaralıq minnetin orınlap atırǵan adamǵa qarsılıq ushın jınayıy juwapkershilik kúsheytildi. Bunday háreketler burınǵı eń kem is haqınıń 50 esesine shekemgiden, 50 esesinen 100 esesine shekem járiyma, 1 jıldan 3 jılǵa shekem azatlıqtan sheklew (aldın 1 jılǵa shekem), 1 jıldan 3 jılǵa shekem azatlıqtan ayırıw menen jazalanadı (aldın 1 jılǵa shekem).

Hákimshilik juwapkershilik haqqındaǵı kodekste hákimiyat wákiliniń, ishki isler hám milliy gvardiya xızmetkerleriniń nızamlı talapların orınlamaǵanı ushın da juwapkershilik sharaları kúsheytilip, járiymalardıń muǵdarı arttırıldı.

Qatnasıwshılar qánigelerden ózlerin qızıqtırǵan sorawlarǵa juwap aldı.

Qaraqalpaqstan xabar agentligi.